शिक्षामन्त्रीको विरोधमा जनकपुरमा विद्यार्थीहरुको र्‍याली

न्यूज ब्यूरो, जनकपुरधाम । जनकपुरमा सोमबार प्राविधिक क्षेत्रका विद्यार्थीहरुले शिक्षामन्त्रीको विरोधमा प्रदर्शन गरेको छ ।

जनकपुरधामको रामानन्दचोकबाट प्राविधिक धारका विद्यार्थीहरुले नारा जुलुस गर्दै नेपाल सरकारका शिक्षामन्त्री गिरिराजमणी पोखरेलेको विरोधमा प्रदर्शन गरेको हो । उनीहरुले शैक्षिक माफिया र सिटिईभिटीको मिलोमतोमा चोर बाटोबाट नयाँ भर्ना प्रकृया सुरु गरेको भन्दै नारावाजी सहित र्‍याली निकालेका थिए ।

सिटिईभिटी तथा कक्षा ११ र कक्षा १२ का पुरानो विद्यार्थीहरुलाई व्यवस्थापन नगरीकन नयाँ भर्ना प्रक्रिया अगाडि बढाउनु सरकारको नियतवंश देखिएको भन्दै जनकपुर सहित विभिन्न ठाउँबाट जनकपुर आएका विद्यार्थीहरुले र्‍याली सहित प्रदर्शन समेत गरेका हुन् । उनीहरुले रामानन्दचोकबाट निकालेको मोटरसाईकल र्‍याली प्रदेश नं. २ को सिटिईभिटी कार्यलय अगाडी गएर प्रदर्शन गरेको थियो ।

विद्यार्थीहरुले सरकार सिटिईभिटी र कक्षा ११, १२ का पुरानो विद्यार्थीहरुलाई छिटो भन्दा छिटो निकास निकाल्नुपर्ने तथा शिघ्र उनीहरुलाई व्यवस्थापन नगरे झन कडा रुपमा प्रस्तुत हुने चेतावनी समेत दिए ।

नेपाल विद्यार्थी सँघ (नेविसँघ) सिटिईभिटी प्रदेश नं. २ को समिति एवम नेविसँघ सिटिईभिटी केन्द्रीय समितको सँयुक्त आयोजनामा जनकपुरमा र्‍याली प्रदर्शन गर्दै अधिकारीलाई ज्ञापन पत्र बुझाउँदै ध्यानकर्षण समेत गराएका हुन् ।

विद्यार्थी नेता शशिन्द्र मोहनराजको विशेष सक्रियतामा निकालिएको रयालीमा विभिन्न गाउँ तथा शहरबाट आएको विद्यार्थीहरुले प्रदर्शन गरेका थिए ।