आजदेखि हाटबजार, पसल, व्यावसाय सहित सबै सेवा नियमित सँचालनमा

न्यूज ब्यूरो, बारा । निजगढ नगर कार्यपालिकाको बसेको बैठकले निजगढ नगरभित्र लाग्दै आएको हाटबजार सञ्चालनमा ल्याउने निर्णय गरेको छ ।

बैठकले हाट बजारसहित नगरपालिकाभित्रका सबै पसल, व्यवसाय, उद्योग प्रतिष्ठान, सेवा व्यवसाय र बैङ्क तथा वित्तिय संस्थाहरु पनि नियमित रुपमा सञ्चालन गर्न दिने निर्णय गरेको हो ।

जिल्ला प्रशासन कार्यालय बाराले यसअघि जारी गरेको निषेधाज्ञा आदेश असोज १ गतेबाट हटाएपछि नगर कार्यपालिका बैठकले हाटबजार, पसल तथा व्यवसाय सञ्चालन गर्ने निर्णय गरेको निजगढ नगरपालिका सुचना अधिकारी रविन घिमिरेले जानकारी दिएकी छन ।

नगरपालिका बैठकले हाटबजार तथा अन्य व्यवसाय एवम् बैङ्क तथा वित्तिय संस्थाहरु पनि नियमित रुपमा सञ्चालन गर्न सकिने छ सुचना अधिकारी घिमिरेले भने कोरोना भाइरस जोखिम कायमै रहेकोले आवश्यक सुरक्षा सर्तकता अपनाएर व्यवसाय सञ्चालन गर्न दिने निर्णय भएको छ ।

उनको अनुसार विद्यालय तथा नगरभित्र सञ्चालित सहकारी संस्थाको साधारण सभा तथा भेला कार्यक्रममा भने अहिले पनि रोक लगाइएको छ । जिल्ला प्रशासन कार्यालयले निषेधाज्ञा हटाउने निर्णय गरेपछि स्थानीय व्यवसायीहरुले पसल तथा व्यवसाय पुर्णकालिनरुपमा सञ्चालन गर्न पाउनुपर्ने भन्दै नगरपालिकामा माग गर्दै आएका थिए ।

यसअघि नगरभित्रका पसल व्यवसायलाई बिहान ८ बजेबाट साँझ ४ र होटल व्यवसाय भने ७ बजेसम्ममात्र सञ्चालन गर्न दिने निर्णय भएको थियो । यसअघि मंगलबार बिहान कोराना भाइरस विपत, न्युनीकरण, व्यवस्थापन तथा अनुगमन समितिको बैठकले पसल, व्यवसाय तथा हाटबजार खोल्न दिने बारेमा निर्णय गर्न कार्यपालिकमा सिफारिस गर्ने निर्णय गरेको थियो ।

कार्यपालिकाको निर्णयसंगै नगरभित्रका पसल, व्यवसाय र हाटबजारसमेत पुर्णरुपमा सञ्चालनमा आउने भएका छन । निजगढ नगरको वडा नम्बर १ , वडा नम्बर ८, वडा नम्बर १० र वडा नम्बर ११ मा हप्ताको दुई दिन हाटबजार लाग्ने गरेको छ ।

कोरोना महामारीका कारण बिगत ६ महिनादेखि हाटबजार भने पुर्णरुपमा बन्दै आएका थिए । नजिकिदै गरेको दशै, तिहार जस्ता चाडपर्वलाई लक्षित गर्दै व्यवसायीहरुको मागअनुसार हाटबजार खोल्ने निर्णय भएको नगरपालिकाकाले जनाएको छ ।