कोरोनाबाट थप १३ जनाको मृत्यु, मृतक संख्या ४२७ पुग्यो

न्यूज ब्यूरो, काठमाडौं । कोरोना भाइरस (कोभिड १९) को संक्रमणबाट पछिल्लो १४ घण्टामा थप १३ जनाको मृत्यु भएको छ ।

काठमाडौं, भक्तपुर, ललितपुर दुईदुई तथा दोलखा, ताप्लेजुङ, सुनसरी, झापा, रुपन्देही, सुर्खेत र सप्तरीका एकएक जनाको मृत्यु भएको हो ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ११ सय ५४ जनामा कोरोना संक्रमण पुष्टि भएको छ । देशभरका प्रयोगशालामा ९ हजार ५३३ नमुना परीक्षण गर्दा ४१८ महिला, ७३६ पुरुषमा संक्रमण पुष्टि भएको हो ।

यससँगै कुल संक्रमितको संख्या ६५ हजार २७६ पुगेको छ । उनीहरुमध्ये हालसम्म ४२७ जनाको मृत्यु भएको छ भने ४७ हजार २३८ जना संक्रमणमुक्त भएका छन् ।