सिरहामा निःशुल्क मास्क बैंक स्थापना

न्यूज ब्यूरो, सिरहा । समुदाय स्तरमा कोरोना भाइरस कोभिड–१९ को संक्रमण जोखिम न्यूनीकरण गर्न सिरहामा निःशुल्क मास्क बैंक स्थापना गरिएको छ ।

कोभिड-१९ को जोखिमबाट जोगिन मास्क अनिवार्य लगाउनु पर्ने भए पनि अधिकांशले मास्क प्रयोग नगरेकोले अनिवार्य मास्क प्रयोग गराउन सिरहा नगरपालिकाको सीमावर्ती क्षेत्र माडरमा निःशुल्क मास्क बैंक स्थापना गरिएको हो ।

'कोही नछुटौं, कोही नचुकौुं' 'नहुनेले लिनुस्, हुनेले दिनुस्' भन्ने मुलनारा सहित मास्क बैंक स्थापना गरिएको युवा अभियन्ता शशि कुमार मण्डलले जानकारी दिए ।

कोभिड–१९ को संक्रमणबाट जोगिन मास्क अनिवार्य भए पनि लकडाउन खुकुलो भएसँगै बजार र घर बाहिर निस्कने अधिकांश व्यक्तिले मास्क प्रयोग गरेको नगरेको र जस कारण व्यक्ति स्वयंम आफै संक्रमणको जोखिममा रहने गरेको र अरुलाई पनि जोखिम पार्न सक्ने सम्भावना बढी रहेकोले प्रत्येक व्यक्तिले मास्क अनिवार्य प्रयोग गरियोस् भन्ने उद्देश्यले मास्क बैंकको स्थापना गरिएको अभियन्ता मण्डलले बताए ।

नेपाल सरकारले प्रत्येक व्यक्तिलाई मास्क प्रयोग गराउन प्रत्येक जिल्लाको जिल्ला प्रशासन कार्यालय मार्फत मास्क नलगाएका व्यक्तिलाई प्रहरीद्वारा एक सय रुपैयाँ जरिवाना गरिने व्यवस्था रहेपनि उक्त जरिवाना हाल महामारीको बेला उपयुक्त नरहेको र संकटमाथि जरिवाना जस्ता संकट थपिएको युवा अभियन्ता सिरहा युथ नेपालकी सचिव दिव्या कुमारी यादवले बताइन् ।

सय रुपैयाँ जरिवानले मदजदूर विपन्न र महिलाहरुले तीर्न नसकिने र उक्त सय रुपैयाँले दुई छाक भोक टार्न मद्दत पुग्ने भएकोले निशुल्क रुपमा मास्क वितरण गर्न थालेको अभियन्ता यादवले बताइन् ।

यता सीमावर्ती तथा ग्रामीण भेगका अधिकांश महिला तथा विपन्न समुदायमाका व्यक्तिहरुमा जनचेतनाको अभावले मास्क प्रयोग नगरेको र यसको महत्व बारे जानकार नरहेकोले संक्रमणको जोखिम उच्च देखिन्छ ।

ती जोखिम र दण्डित हुनबाट जोगिन उक्त मास्क बैंकको स्थापना गरेको लैंगिक हिंसा नियन्त्रण सञ्जाल समिति सिरहाका कोषाध्यक्ष संतोष अग्रवालको भनाइ छ ।

युकेएडको अर्थिक सहयोगमा भिएसओ नेपाल र इन्टरनेशनल अलर्टको सहकार्यमा समग्र जनउत्थन केन्द्रद्वारा संचालित सहज परियोजना अन्तरगत कोरोना भाइरस महामारी तथा लैंगिक हिंसा विरुद्ध सचेतना अभियानका लागि युवा अभियान मार्फत सिरहा युथ नेपालको आयोजनामा मस्क बैंक संचालन गरिएको सहज परियोजना व्यवस्थापक कृष्ण साहले जनाए ।