रक्तदान सबभन्दा ठुलो समाजसेवा : नेता अरगरिया

न्यूज ब्यूरो, जनकपुरधाम । जनता समाजवादी पार्टीका नेता एवम् धनुषा निर्वाचन क्षेत्र नं. २ का प्रतिनीधिसभा सदस्य (सँघीय साँसद) उमा शंकर अरगरियाले रक्तदान पनि ठुलो समाजसेवा भएको बताएका छन् ।

सोमबार धनुषाको हँसपुर नगरपालिका वडा नं. ६ सोनिगामा चोकमा जनता समाजवादी पार्टीले आयोजना गरेको रक्तदान कार्यक्रममा बोल्दै नेता अरगरियाले एक जनाको रक्तले कसैको जीवन बाँच्न सक्ने भएकोले त्यो भन्दा ठुलो समाजसेवा केही नभएको जिकिर गरेका छन् ।

उनले रक्तदान जीवनदान मूल नारा सहित रक्तदान गर्नु समाज र मानव सेवाको लागि एक उदाहरण साबित हुँदै गएको बताए । उनले नियमित रुपमा स्वास्थ्यको प्रोटोकोल अपनाएर रक्तदान गरी समाज र मानवसेवालाई सहयोग पुरयाउन आफ्ना कार्यकर्ताहरुलाई आग्रह गरे ।

नेपाल रेडक्रस सोसाइटीको सहकार्यमा जसपाले आयोजना गरेको रक्तदान कार्यक्रममा ५१ जनाले रगत दिएका छन् । कार्यक्रममा उपस्थित अधिकांश युवा र एक जना नेपाल प्रहरीले रक्तदान गरेका हुन् ।

जसपाका युवा नेता राजेश कुमार यादबको अध्यक्षतामा सम्पन्न भएको रक्तदान कार्यक्रममा ५१ जनाले आफ्नो रगत दिएका थिए । हँसपुरका मेयर रामज्ञान मण्डलको विशिष्ट आतिथ्यमा सम्पन्न कार्यक्रममा नेपाल रेडक्रस धनुषाको सभापति नरेश प्रसाद सिंह अतिथिको रुपमा उपस्थित भएका थिए ।

कोरोना महामारीका बेला रगतको चरम अभाव भइरहेका कारण रक्तदान कार्यक्रमको आयोजना गरिएको नेता राजेश यादबले बताए ।

मेयर मण्डलले पनि रक्तदान जिवन दान हो भन्दै रक्तदान गरेपनि स्वास्थ्यमा कुनै समस्या नआउने गरेको सुनाएका थिए ।

उक्त कार्यक्रममा पार्टी नगर अध्यक्ष लाल बाबू यादव,कमला नगर अध्यक्ष मनिक लाल मण्डल युवा जिल्ला अध्यक्ष दिपु कापरी,सरोज कुमार मण्डल, युवा केन्द्रीय सचिव अशोक कुमार मण्डल,औरही नगर अध्यक्ष कमदेब मण्डल,विनोद रोहिता,जिवछी महतो,सुरेन्द्र कुमार मण्डल लगायतका पार्टीको नेताकार्यकर्ताको उपस्थिति रहेका थिए ।