सिरहामा थप दुई साताका लागि निषेधाज्ञा लम्ब्याइयो

न्यूज ब्यूरो, सिरहा । सिरहामा प्रशासनले निषेधाज्ञा लम्ब्याएको छ ।

कोभिड–१९ संक्रमण बढ्दै गइरहेको र जखिम कायमै रहेको भन्दै असोज १० गतेसम्मको लागि जिल्ला प्रशासन कार्यालय सिरहाले निशेधाज्ञा लम्ब्याएको हो ।

जिल्लामा कोभिड(१९ को संक्रमण नियन्त्रण गर्न भदौ २७ गते राती १२ बजेबाट लागु हुनेगरी दुई साताको लागि असोज १० गतेसम्म निशेधाज्ञा थप गरिएको छ । यसअघि जिल्लामा भदौ २७ गते राती १२ बजेसम्मका लागि निषेधाज्ञा जारी गरिएको थियो ।

जिल्ला प्रशासन कार्यालयले आदेश पालना गर्न जिल्लाका १७ वटै स्थानीय तह, राजनीतिक क्षेत्र, उद्योग वाणिज्य संघ संस्था तथा समाजिक संघ संस्थालाई अनुरोध गरेको छ ।

प्रमुख जिल्ला अधिकारी प्रदिपराज कणेलद्वारा हस्ताक्षरित आदेश पत्रमा अघिको भन्दा निषेधाज्ञा खकुलो हुनेगरी आदेश गरिएको छ । हटबजार, विद्यालय, सभा, जुलुस, जिमखाना, सभागोष्ठी जस्ता मानिस भिडभाड हुने खालका कार्यमा बन्देज लागाएको भएपनि नीजी तथा भाडाका जीप, कार, भ्यान जस्ता सबारी साधनमा निर्बाध रुपमा मास्क लगाई दुरी कायम गरी यात्रा गर्न पाइने उल्लेख गरिएको छ ।

यसअघि चारपाङ्ग्रो अत्यावश्यक खाद्यान्न, औषधी, इन्धन, दुघ लागयतका सवारी साधन चलेको भएपनि निजी सवारी साधनमा भने रोक लगाइएको थियो । यस पटकको आदेशानुसार निजी सवारीसाधन सुरक्षा सतर्कता अपनाएर जिल्लाभरी चलाउन पाउने भएको छ ।

सार्वजनिक सवारी साधनका चालक र सहचालकले अनिवार्य रुपमा मास्क लगाउनु पर्ने पनि जारी पत्रमा भनिएको छ ।