जग्गा दान गरेको अढाई वर्ष भयो, अझै बनेन अस्पताल, सर्वसाधारणलाई सास्ती

न्यूज ब्यूरो, सिरहा । अस्पताल अब हरेक ठाउँमा नभई नहुने झैँ भइसकेको छ ।

सरकारले पनि देशका हरेक ठाउँमा स्वास्थ्य सेवा विस्तारको लक्ष्यसहित अगाडि बढेको बताउँदै आएको छ । देशमा संघीयतापछि तीन तहको सरकार आएको झण्डै ३ वर्षबढी भयो ।

तर, देशका कतिपय स्थानमा भने अझ पनि जनताले सेवा लिन मिल्ने खालका सामुदायिक अस्पताल निर्माण हुन सकेको छैन । कल्याणपुर नगरपालिकामा स्थानीय सरकार आएदेखि नै ‘बर्थिङ सेन्टर’सहितकको अस्पताल बन्ने चर्चा चल्दै आएको छ ।

तर, त्यो चर्चा चर्चामै सीमित भएको छ । नगरपालिकामा ‘बर्थिङ सेन्टर’सहितकको सरकारी अस्पताल बन्ने भन्दै जग्गा दाताको खोजी भयो । चार–पाँच महिनासम्म जग्गा नै भेटेन ।

नगरपालिकामा बर्थिङ सेन्टरसहितको सरकारी अस्पताल बन्ने र त्यसको लागि जग्गा चाहिएको कुरा सुनेपछि कल्याणपुर–९ डुमरीका धर्मनाथ यादव ७ कठ्ठा जग्गा दान गरे । अस्पतालको लागि आवश्यक झण्डै करिब ३५ लाख मूल्य बराबरको ७ कठ्ठा जग्गा उनले अढाई वर्षअघि नै अस्पतालको नाममा पनि गरिदिएका छन् ।

तर, सरोकारवाला निकाय र जनप्रतिनिधिको उदासीनताले नगरबासीको बर्थिङ सेन्टरसहितको अस्पतालको सपना अझ पूरा हुन सकेको छैन ।

विभिन्न समयमा चाँडै काम सुरु हुने आश्वासन सम्बन्धित निकायबाट स्थानीयहरुले पाएपनि त्यो आश्वासन मुखसम्मै सीमित हुँदा यहाँका सर्वसाधारण अझ सास्ती खेप्न बाध्य छन् । अस्पताल निर्माण नुहँदा प्रसुति गराउन तथा अन्य स्वास्थ्य सेवा लिन पनि बाहिरै जानुपर्ने बाध्यता छ ।

नगरपालिकामा जम्मा १२ वटा वडा छन् । तर, सबै वडामा वडास्तरीय स्वास्थ्य चौकी पनि छैन । केहि वडामा भएपनि त्यो नाम मात्रैको भएको स्थानीय बताउँछन् ।

अस्पताल निर्माणमा उदासीनता देख्दा निराश भएका छौं : जग्गा दाता

अस्पताल निर्माणको लागि जग्गा दान गरेका डुमरीका धर्मनाथ यादवका छोरा विनोद यादवले अझसम्म अस्पताल निर्माण नहुँदा निराश भएको सुनाउँछन् । ‘जग्गा दान गरेर बुवा बितिसक्नु पनि भयो,’ उनले भने, ‘तर अस्पताल भने अझ नबन्दा निराश भएका छौं ।’

अस्पतालको लागि बढी जग्गा चाहिएका कारण सुरुमा कसैले दिन पनि नमानेको र आफूले समाज तथा यस क्षेत्रका जनताको लागि राम्रो होस् भनेर दिएको उनको कथन छ । ‘७ कठ्ठा जग्गा दान गर्नु चानचुने कुरा होइन,’ उनले भने, ‘तर यहाँका जनतालाई राम्रो होस् भनेर दान गर्यौं ।’

अस्पताल बन्ने आशामा जग्गा दिएपनि अझ नबन्दा यहाँका जनता प्रत्यक्ष समस्या खेप्न बाध्य भएको उनको भनाई छ । स्वास्थ्य जस्तो संवेदनशील कुरामा खेलाँची नगरी अस्पताल निर्माणमा सम्बन्धित निकायले चाँडै चाँसो लिनुपर्ने स्थानीयहरुको माग छ ।