हरेकदिन ३०० बढी भोकालाई खाना खुवाउँदै विराटनगरका युवाहरु

न्यूज ब्यूरो, विराटनगर । पहिले लकडाउन भयो, अहिले निषेधाज्ञा छ । जनता घरमै छन् । अत्यावश्यक कामका लागि निस्किनेबाहेक सबै थुनिएका छन् ।

स्वास्थ्य मन्त्रालयको “प्रोटोकल” अनुसार संक्रामक रोगबाट बच्ने अन्तिम विकल्प पनि यही नै हो, सकभर घरबाहिर कामबेगर ननिस्किनू ।

कोरोना कहरसँगै लकडाउन सुरू भयो । सबैतिर बन्द भएपछि मजदुरी गर्नेहरू सडकमा आइपुगे । सडकपेटीमै बस्नेहरूको त झन् न घर छ, न आफन्त न खानेकुरा । पहिले मानिसहरूको आवागमन हुँदा उनीहरू हात फैलाउँथे, पाएको काम गरेर जीविका चलाउँथे ।

कसैले इच्छाले दिएको दान (रुपैयाँ) ले मुखमा माड लाग्थ्यो, कमाएको रकमले जे–जस्तो छाक टर्थ्यो । हिजोआज कोरोना संक्रमण बढ्न थालेपछि लकडाउनभन्दा दर्बिलो शैलीमा स्थानीय प्रशासनले निषेधाज्ञा जारी गरिरहेको छ ।

विराटनगर महानगरपालिकामा पनि निषेधाज्ञा जारी छ । यस्तोमा अहिले सडकमै बास भएका भिख मागेर खाने दुई सय हाराहारी र अन्य मजदुरहरूको अवस्था के भयो होला ?

उनीहरूको भोको पेटको चिन्ता स्थानीय युवाहरूले गरेका छन् । संक्रामक रोगको पर्वाह नगरी केही युवाहरू सडकमा दिनहुँ असहायलाई खान बाँड्दै हिँडिरहेका छन् ।

ती असहायहरू भोकै “नमरून्” भनेर विराटनगरका युवाहरूले दैनिक खाना खुवाउन थालेको पनि अहिले भर्खर होइन । स्थानीय निकाय, प्रदेश सरकार, स्थानीय प्रशासन कसैको नजरमा नपरेका ती असहायलाई युवा वसिम आलमको नेतृत्वमा महिनौंदेखि खाना खुवाइरहेका छन् ।

पहिलोपटक लकडाउन सुरू भएपछि नै असहायलाई निस्शुल्क खाना खुवाउने अभियान थालिएको युवा अभियन्ता राकेश रोशन यादव बताउँछन् ।
लकडाउन अन्त्यपछि निषेधाज्ञा जारी हुँदा सडकपेटीमा बस्नेहरु भोकै देखिएपछि यहाँका युवाहरुले यस अभियानलाई निरन्तरता दिएका हुन् । अभियानलाई निरन्तरता दिँदै फेरि बिहान ८–१० र बेलुका ७(९ बजेसम्म खाना खुवाउने काम गरिरहेको आलमले बताए ।

हरेक दिन ३ सयको हाराहारीमा खाना खुवाइने गरिएको छ । आलमले यो अभियान राजनीतिभन्दा टाढा रहेको बताए । निःशुल्क खाना पकाउने(खुवाउने अभियानमा कुनै ब्यानर(झन्डा बोक्न नपाइने नियम पनि छ ।

यो समयमा अभियानका सदस्यलाई हिँडडुल गर्न, सामान जुटाउन प्रहरीले रोकटोक गरेको छैन । यसबारे स्थानीय प्रशासनलाई जानकारी दिएकाले समस्या छैन ।

यसलाई आवश्यकता परेअनुसार जुनसुकै समयमा निरन्तरता दिने योजना उनीहरूको छ ।