सिरहामा आज एकैदिन ४२ जनामा कोरोना पुष्टि, मृतक संख्या ३ पुग्यो

न्यूज ब्यूरो, सिरहा । सिरहामा पछिल्लो २४ घण्टामा ४२ जनामा कोरोना भाइरस संक्रमण पुष्टि भएको छ ।

संक्रमण पुष्टि हुनेहरुमा ३२ जना लहान नगरपालिकाकै रहेका छन् । जसमध्ये २२ जना ईलाका प्रहरी कार्यालय लहानका प्रहरी, ८ जना थुनुवा, एक जना कारागार पठाइएका व्यक्ति तथा अन्य एकजना छन् ।

मिर्चैयामा आज ५ जनामा कोरोना संक्रमण पुष्टि भएको छ । संक्रमितहरु ४ जना नगरपालिकाका कर्मचारी तथा एकजना मिर्चैया ४ का ६८ वर्षीय पुरुष छन् । ती पुरुषको मंगलबार स्वाब लिइएकोमा बुधबार नै मृत्यु भइसकेको छ भने आज उनको पीसीआर रिपोर्ट पोजेटिभ आएको छ ।

यस्तै, धनगढीमाई नगरपालिकामा पनि ४ जनाको रिपोर्ट पोजेटिभ आएको छ । उनीहरुमध्ये दुई जना नयनपुर अस्पतालका स्वास्थ्यकर्मी रहेका छन् भने दुई जना सर्वसाधारण छन् ।

गोलबजार नगरपालिकामा भने आज २ जनामा संक्रमण पुष्टि भएको छ । यससँगै जिल्लामा कूल संक्रमित संख्या ३५७ पुगेको छ । जसमध्ये हाल १३८ जना उपचाररत छन् भने २१५ जना निको भएर डिस्चार्ज भइसकेका छन् । यस्तै, कोरोना संक्रमणबाट हालसम्म जिल्लामा मृत्यु हुनेको संख्या ३ पुगेको छ ।

जिल्लामा हालसम्म ५ हजार ९ सय ९२ जनाको थ्रोट स्वाब संकलन गरिएकोमा ५ हजार ४ सय ३१ जनाको रिपोर्ट निगेटिभ आएको छ । २ सय ४ जनाको रिपोर्ट आउन भने बाँकी रहेको जिल्ला स्वास्थ्य कार्यालय सिरहाका प्रमुख कृष्णदेव यादवले जानकारी दिए ।