सिरहामा एकैदिन २५ जनामा कोरोना पुष्टि, गोलबजारका इन्सपेक्टर पनि संक्रमित

न्यूज ब्यूरो, सिरहा । सिरहामा आज एकैदिन २५ जनामा कोरोना भाइरस संक्रमण पुष्टि भएको छ ।

पछिल्लो २४ घण्टामा गोलबजार नगरपालिकामा १५, सिरहा नगरपालिकामा ९ र नरहा गाउँपालिकामा एकजनामा संक्रमण पुष्टि भएको हो । गोलबजारका संक्रमितमध्ये दश जना प्रहरी नै छन् ।

ईलाका प्रहरी कार्यालय गोलबजारका प्रहरी निरीक्षकसहित १० जनाको पीसीआर रिपोर्ट पोजेटिभ आएको हो । बाँकी ५ जना भने कन्ट्याक्ट ट्रेसिङका आधारमा स्वाब लिइएका व्यक्तिहरु हुन् ।

यस्तै, सिरहा नगरपालिकामा संक्रमण पुष्टि हुनेहरुमा एक प्रहरीसहित ९ जना रहेका छन् । यससँगै सिरहामा एक्टिभ संक्रमितको संख्या ८७ पुगेको जिल्ला स्वास्थ्य कार्यालय सिरहाका प्रमुख कृष्णदेव यादवले जानकारी दिए ।