सिरहामा फेरि थपिए ८ संक्रमित, आजै १३ जनामा संक्रमण पुष्टि

न्यूज ब्यूरो, सिरहा । सिरहामा फेरि ८ जनामा कोरोना भाइरस संक्रमण पुष्टि भएको छ ।

यसअघि आजै बिहान ५ जनामा संक्रमण पुष्टि भएको थियो । नयाँ भेटिएका संक्रमितमध्ये लहान नगरपालिकाका मात्रै चारजना रहेका छन् ।

यस्तै, बरियारपट्टी गाउँपालिकाका २ जना, नवराजपुर गाउँपालिकाका १ जना र मिर्चैया नगरपालिकाका १ जना गरी जम्मा आठ जनामा संक्रमण पुष्टि भएको जिल्ला स्वास्थ्य कार्यालय सिरहाका प्रमुख कृष्णदेव यादवले जानकारी दिए ।

लहानका संक्रमितमध्ये २ जना सशस्त्र प्रहरी, १ जना स्वास्थ्यकर्मी र एकजना थुनुवा रहेका छन् । यस्तै, बरियारपट्टीका एकजना कर्मचारी र एकजना कन्ट्याक्ट ट्रेसिंगका आधारमा परीक्षण गरिएका व्यक्ति छन् । यसैगरी, नवराजपुरका संक्रमित क्वारेन्टाइनका छन् भने मिर्चैयाका संक्रमित पनि क्वारेन्टाइनकै छन् । मिर्चैयाका संक्रमितको स्वाब कर्जन्हा नगरपालिकामा लिइएको थियो ।

यससँगै सिरहामा आज संक्रमण पष्टि हुनेको संख्या १३ पुगेको छ । यसअघि सशस्त्र प्रहरी बल सन्हैठाका २ जना, इलाका प्रहरी कार्यालय मिर्चैयामा रहेका एकजना थुनुवा, सिरहाको क्याम्पसमा सञ्चालित क्वारेन्टाइनका एकजना तथा सिरहास्थित एक होटलमा काम गर्ने एकजनामा गरी पाँच जनामा संक्रमण पुष्टि भएको थियो ।

सिरहामा हालसम्म कोरोना भाइरस संक्रमितको संख्या २६४ पुगेको छ । जसमध्ये हाल ५८ जना उपचाररत छन् भने २ सय ६ जना उपचारपछि निको भएर डिस्चार्ज भइसकेका छन् ।