तिवारीको सक्रियताले प्रशासन भयभित, रिहा नगरे आन्दोलन हुन्छ : नेविसंघ

न्यूज ब्यूरो, बीरगँज । नेपाली काँग्रेसका भातृ एवम् विद्यार्थी सँगठन नेपाल विद्यार्थी सँघ (नेविसँघ) का पर्सा जिल्ला अध्यक्ष विकास तिवारीको हर्कतले प्रशासन भयभित भएको बताइएको छ ।

सँघले आज गरेको पत्रकार सम्मेलनमा तिवारीले विगतका दिनहरुमा स्थानीय प्रशासन र प्रहरी विरुद्ध गरेको आन्दोलनले भयवित भएर उनलाई पक्राउ गरिएको बताइएको छ । तिवारीलाई प्रहरीले रिहा नगरे कडा आन्दोलन गर्ने संघले चेतावनी समेत दिएको छ ।

पक्राउ पारिएका तिवारीलाई बिनासर्त रिहा गर्न माग गर्दै उनीहरुले तिवारीलाई प्रहरीले झुटो मुद्दा लगाएर पक्राउ गरेको संघका पुर्व अध्यक्ष राकेश यादवले बताए । उनले राजनीतिक दवावमा आएर पर्सा प्रहरीले विद्यार्थी नेता तिवारीलाई पक्राउ गरेको आरोप लगाए ।

प्रहरीले तिवारीलाई पक्राउ गर्ने कारण समेत नखुलाएको यादवले भने, ‘प्रहरीले विकास तिवारीलाई पक्राउ गर्ने स्पष्ट कारण समेत बताउन सकेको छैन, साइबर अपराध गरेको मात्र भनेको छ, के अपराध, कस्तो अपराध केहि विवरण खुलाएको छैन, राजनीतिक दवावमा विकासलाई पक्राउ गरिएको छ ।’

नेपाली कांग्रेसका नेता समेत रहेका यादवले तिवारीलाई बिना सर्त रिहा नगरीए आफुहरु चरणबद्ध आन्दोलन सुरु गर्ने चेतवानी समेत दिए ।

तिवारीलाई हिजो प्रहरीले घरबाटै तिवारीलाई बोलाएर हिरासतमा लिएको थियो । उनी माथी शान्ति सुरक्षा भङ्ग गरेको प्रहरीले आरोप लगाएको छ ।