सिरहाः हडपिएको सार्वजनिक जग्गामा झण्डा गाडिए, प्रदर्शन सहित चक्काजाम !

न्यूज ब्यूरो, सिरहा । विगत केही दिनदेखि विवादित र हडपिएका भनिएको सिरहाको गोलबजार– ९ स्थित पूर्वपश्चिम राजमार्गमा रहेको सार्वजनिक जग्गामा झण्डा गाडिएको छ ।

आज (विहिबार) दिउँसो करिब २ बजेको समयमा करोडौंको जग्गा निजीकरण भएको विरोधमा प्रदर्शन गर्दै स्थानीयहरुले सो जग्गामा झण्डा गाडेका हुन् ।

राजनीतिक पहुँच र पैसाको चलखेलमा सरकारी जग्गालाई निजि बनाइएको भन्दै पूर्वपश्चिम राजमार्गमा प्रदर्शनसहित चक्का जाम समेत गरेका हुन् ।

साबिकको चन्द्रउदयपुर वडा नं. ८ (क) अन्तर्गत पर्ने कित्ता नम्बर ४२० को २ बिघा ९ कठ्ठा ३ धुर जग्गा २०५८ सालमा दुईजना गैरदलितले पैसाको चलखेल गरि संयुक्त रुपमा आफ्नो नाममा गराएका थिए । त्यसपछि २०७५ सालमा सो जग्गाको रष्टरी बदरको मागसहित नगरपालिकाले जिल्ला अदालत सिरहामा मुद्दा गरेको थियो ।

तर, अदालतले गत साउन २६ गते जग्गा पास गराएकाहरुकै पक्षमा फैसला गरिदिएपछि विरोध चर्किएको हो । नगरपालिकाले जनताको आँखामा छारो हाल्न मुद्दा गरेको र पैसाको बार्गेनिङ गरेर मुद्दा हारेको स्थानीयहरुको आरोप छ ।

स्थानीय प्रदर्शनकारीहरुले चक्काजामपछि प्रदर्शन गर्दै हड्पिएको सार्वजनिक जग्गामा नेपालको राष्ट्रिय झण्डा फहराउँदै चक्काजाम र प्रदर्शन गरेका छन् । सो क्रममा प्रदर्शनकारी र प्रहरीबीच केही बेर घम्साघम्सीसमेत भएको थियो ।

स्थानीयहरु भोलि (शुक्रबार) फेरि चक्काजाम गर्ने जनाएका छन् । उनीहरूले बुधबार सिरहा सदरमुकाममा प्रदर्शन गर्दै प्रमुख जिल्ला अधिकारीलाई ज्ञापन पत्रसमेत बुझाएका थिए ।