समाजसेवी गिरीको निधनले जनकपुर शोकमग्न

न्यूज ब्यूरो, जनकपुरधाम । जनकपुरधाममा समाजसेवीको रुपमा चिनिएको कृष्ण गिरीको मृत्युले जनकपुरमा शोक छाएको छ ।

कोरोना सङ्क्रमण देखिएपछि साउन ५ गते विमान चार्टर गरेर उनलाई काठमाडौं स्थित मेडिसिटी अस्पतालमा भर्ना गरिएको थियो । उपचारको क्रममा उहाँको ७३ वर्षको उमेरमा गएराति निधन भएको परिवारिक श्रोतले पुष्टि गरेपछि जनकपुरमा शोक छाएको हो ।

नेपाल परिवार नियोजन सङ्घ धनुषाको संस्थापक अध्यक्ष हुनुका साथै लगातार २५ वर्षसम्म अध्यक्ष भएर सफलतापूर्वक भूमिका निर्वाह गर्नुभएका गिरी सो संस्थाको केन्द्रीय उपाध्यक्षमा समेत भइसकेका छन् ।

जनकपुरस्थित रामा होटलका सञ्चालकभन्दा पनि समाजसेवीको रुपमा चिनिएका गिरीको निधनले विहानैदेखि समाजिक सँजालमा शोक र श्रद्धाञ्जलीले भरिएको छ । व्यापारीवर्गदेखि, समाजसेवी, पत्रकार, युवा, अगुवा, नागरिक समाज, होटल व्यावासायीहरुले शोक व्यक्त गरेका छन् ।

जनकपुरका साथै धनुषा जिल्ला समाजसेवाको क्षेत्रमा उनको महत्वपूर्ण योगदान रहेको छ ।