सिरहा नगरपालिकामा अख्तियारको छापा

न्यूज ब्यूरो, सिरहा । सिरहा नगरपालिकामा अख्तियारको टोलीले केही कागजातहरु नियन्त्रणमा लिएको छ ।

नगरपालिकाले कोरोना भाइरस नियन्त्रण तथा रोकथामको नाममा व्यापक अनियमिता गरेको विषयमा समाचार आएपछि अख्तियारको टोली सिरहा पुगेको हो ।

अख्तियारको टोलीले नगरपालिकाले कोभिड–१९ नियन्त्रणमा गरेको खर्च सम्बन्धि कागजातहरु अनुसन्धानको लागि कार्यालयबाट नियन्त्रणमा लिएको छ । अख्तियार दुरुपयोग अनुसन्धान आयोग बर्दिबासका मणि ज्ञवाली, अधिकृत नवराज सुवेदी नेतृत्वको टोलीले खर्च विवरणको कागजातहरु नियन्त्रणमा लिएका हुन् ।

कोभिड १९ रोकथाम, नियन्त्रणमा खरिद सम्बन्धी कागजातको प्रतिलिपि छानबिनको लागि नियन्त्रणमा लिएको अख्तियारले जनाएको छ । नगरपालिकाले कोरोनामा खर्च गरेको विवरणमा अनियमितताको गुनासो आएपछि अख्तियारले चासो लिएको हो ।

सिरहा नगरपालिकाले जिल्ला स्तरीय कोभिड नियन्त्रण समितिलाई ५ करोड ९० लाख ८६ हजार रुपैयाँ खर्च गरेको विवरण बुझाएको थियो ।