कोरोना जाँच्ने पिसिआर मेसिन खरिद गर्न भोली बैठक

न्यूज ब्यूरो, बारा । बारामा पिसिआर मेसिन खरिद गर्न बाराका सबै १६ वटै स्थानीयतह प्रमुखको बैठक साउन २५ गते आइतबार बस्ने भएको छ ।

विश्व ब्यापी महामारीको रुपमा फैलिएको कोरोना भाइरससंग लड्न हामी बाराका सबै स्थानिय तह एक जुट भएर लाग्ने महागढीमाई नगरपालिकाका नगर प्रमुख उपेन्द्र प्रसाद यादबले बताएका छन ।

नगर प्रमुख यादबले यो कामका लागि सबै संग मौखिक सहमति भैसकेको पनि बताएका छन ।वहाले यदि कुनै कारण बस कुनै स्थानीयतहले यो महाअभियानमा साथ नदिए कलैया उपमहानगरपालिका र महागढीमाई नगरपालिका मिलेर बाराको लागि पिसिआर मेसिन खरिद गर्ने बताएका छन ।

हामीले सबै बिकास आफ्नो जनताका लागि गर्नुपर्ने हो तर अहिलेको महामारीबाट आफ्नो जनतालाई नै जोगाउन नसकिए कसका लागि अन्य बिकास भन्दै यादबले आफुहरु जनता प्रती पुर्ण बफादार तथा इमान्दारीका साथ यो लडाईमा साथ दिने कसम समेत खाएका छन ।

यता कलैया उपमहानगरपालिकाका नगर प्रमुख राजेश राय यादबले आफुहरु कोरोना सङ्ग लड्न हरेक पाइला चाल्न कुनै कसर बाकी नराख्ने बताउदै कलैया लगायत अन्य सबै पालिकाको जनताको साथमा यो लडाईमा साथ रहने बताएका छन ।

उनले अहिलेको लकडाउन को पुर्न पालना समेत गर्न सबै नगरबासी तथा जिल्ला बासी संग आग्रह गरेका छन । त्यस्तै आज मात्रै जिल्ला कोभिड संकट व्यवस्थापन केन्द्र बारा को बैठक प्रमुख जिल्ला अधिकारी रुद्र प्रसाद पण्डितको अध्यक्षतामा सम्पन्न भएको छ ।

बैठकले परिक्षणको दायरा व्यापक रुपमा विस्तार गर्न आवश्यक देखिएकोले सबै सुरक्षा निकाय तथा राष्ट्र सेवक कर्मचारीहरुको प्रयोजनको लागि विपद् व्यवस्थापन कोषबाट एकहजार थान भिटियम किट खरिद गर्ने साथै बाराको १६ वटै स्थानीय तहहरुलाई आशंकित व्यक्तिहरुको परिक्षण गर्नको लागि खरिद गर्न समेत निर्णय गरेको छ ।

त्यस्तै जिल्लामा कोरोना भाईरसबाट संक्रमित व्यक्तिहरुको संख्या दिनानु दिन बढ्दै गईरहेको तथा कलैया अस्पतालका स्वास्थ्यकर्मीहरु समेत ठूलो संख्यामा संक्रमणमा देखिएकोले हाल जारी गरिएको निषेधाज्ञालाई थप प्रभावकारी बनाउन आवश्यक देखिएकोले निषेधाज्ञामा उल्लेखित सेवा विहान ८ बजेसम्म मात्र संचालन गर्ने गरी बाँकी समयमा जिल्लाभर निषेधाज्ञालाई परिस्थितीको मूल्यांकन गरी थप प्रभावकारी बनाउने निर्णय भएको छ ।