सिरहामा कोरोना रोकथाम र उपचारका नाममा झण्डै २१ करोड खर्च

न्यूज ब्यूरो, सिरहा । सिरहाका १७ वटा स्थानीय तहमध्ये १२ स्थानीय तहले कोरोना भाइरस (कोभिड–१९) को संक्रमण रोकथाम तथा उपचारमा गरेको खर्च विवरण सार्वजनिक गरेका छन् ।

जिल्ला प्रशासन कार्यालय सिरहाले खर्च विवरण उपलब्ध गराउन दिएको निर्देशनपछि विभिन्न १२ पालिकाले विवरण सार्वजनिक गरेको हो ।

कोरोना रोकथाम तथा नियन्त्रणमा गरेको खर्चको विवरण सार्वजनिक गरेका विभिन्न १२ स्थानीय तहले हालसम्म झण्डै १९ करोडबढी खर्च गरेका छन् । खर्च विवरण सार्वजनिक गरेका १२ स्थानीय तहहरुमध्ये सबैभन्दा बढी सिरहा नगरपालिकाले खर्च गरेको छ भने सबैभन्दा कम खर्च अर्नामा गाउँपालिकाले गरेको छ ।

सिरहा नगरपालिकाले हालसम्म ५ करोड ९० लाख ८६ हजार ४ सय ३० रुपैयाँ खर्च गरेको जनाएको छ । यस्तै, औरही गाउँपालिकाले २ करोड २० लाख ८० हजार ९ सय ३० रुपैयाँ खर्च गरेको छ ।

त्यसैगरी, लहान नगरपालिकाले १ करोड ९८ लाख ४ हजार ७८ रुपैयाँ, मिर्चैया नगरपालिकाले १ करोड ७२ लाख ८१ हजार ७७ रुपैयाँ, बरियारपट्टी गाउँपालिकाले १ करोड ५७ लाख २३ हजार ७ सय ६७ रुपैयाँ, कर्जन्हा नगरपालिकाले १ करोड ४८ लाख १५ हजार ८ सय १६ रुपैयाँ र गोलबजार नगरपालिकाले १ करोड ६ लाख ८ हजार ५ सय ५३ रुपैयाँको खर्च विवरण सार्वजनिक गरेका छन् ।

यस्तै, विष्णुपुर गाउँपालिकाले ८८ लाख ६१ हजार ७ सय १० रुपैयाँ, नरहा गाउँपालिकाले ७३ लाख ५९ हजार २ सय ४९ रुपैयाँ, लक्ष्मीपुरपत्तारी गाउँपालिकाले ६९ लाख ६५ हजार ६ सय ९५ रुपैयाँ, धनगढीमाई नगरपालिकाले ५५ लाख ९४ हजार ६ सय ३३ रुपैयाँ र अर्नामा गाउँपालिकाले ३९ लाख ५९ हजार १ सय ३ रुपैयाँ खर्च गरेका छन् ।

बाँकी रहेका ५ स्थानीय तहको खर्च विवरण भने सार्वजनिक भएको छैन । कल्याणपुर नगरपालिका, सुखिपुर नगरपालिका, सखुवानन्कारकट्टी गाउँपालिका, भगवानपुर गाउँपालिका र नबराजपुर गाउँपालिकाले तत्काल खर्च विवरण उपलब्ध गराउन नसकेको हो । विवरण उपलब्ध नगराएका स्थानीय तहहरुलाई पनि चाँडै उपलब्ध गराउन निर्देशन दिएको प्रमुख जिल्ला अधिकारी प्रदीपराज कणेलले जानकारी दिए ।

यस्तै, जिल्ला अस्पताल सिरहाले १ करोड ३८ लाख ५९ हजार ७ सय ७ रुपैयाँ तथा जिल्ला स्वास्थ्य कार्यालय सिरहाले ३० लाख ८६ हजार २ सय ८८ रुपैयाँ खर्च भएको विवरण सार्वजनिक गरेका छन् ।

विवरण अनुसार, हालसम्म सिरहामा कोरोना रोकथाम तथा नियन्त्रणमा २० करोड ९० लाख ४७ हजार ३५ रुपैयाँ खर्च भएको छ । एकमुष्ट रुपमा खर्च भएको विवरण सार्वजनिक गरिएपनि कुन शिर्षकमा कति खर्च भयो भनेर कसैले खुलाएका छैनन् । पारदर्शी ढंगले कसैले पनि खर्च विवरण सार्वजनिक गर्न चाहेका छैनन् ।

खर्च विवरण सार्वजनिकीकरणपछि कोरोना भाइरस रोकथाम तथा उपचारका नाममा स्थानीय तहहरुले मनपरी अनयमितता गरिरहेको कुरा जनस्तरबाट उठेको छ ।

सरकारी निकायले स्पष्ट र पारदर्शी ढंगले हरहिसाब सार्वजनिक नगरेर अनियमितता लुकाउन खोजेको पत्रकार महासंघका केन्द्रीय सदस्य देवकुमार यादव बताउँछन् ।