जसपा बैठक : कुन कुन एजेन्डामाथि हुँदैछ छलफल ?

न्यूज ब्यूरो, काठमाडौं । जनता समाजवादी पार्टी (जसपा)को केन्द्रीय कार्यकारिणी समितिको बैठक बुधबारदेखि सुरु भएको छ ।

समाजवादी पार्टी र राष्ट्रिय जनता पार्टी एकीकरण भएर बनेको जसपाकोे केन्द्रीय कार्यकारिणी समितिको पहिलो बैठक बुधबारदेखि सुरु भएको हो ।

ललितपुरको च्यासलस्थित तुलसीलाल अमात्य स्मृति प्रतिष्ठानको भवनमा बैठक सुरु भएको हो । बैठकको पहिलो दिन नेताहरुबीच परिचय आदानप्रदान भएको केन्द्रीय सदस्य मनिष सुमनले बताए ।

उनले पार्टीको राजनीतिक प्रतिवेदन, अनुशासन आचारसंहिता, पार्टीको समायोजन कार्यनिर्देशिका र समसामयिक राजनीतिक परिस्थिति लगायतका विषय बैठकको एजेण्डा रहेको बताए ।

बैठकमा दुई पार्टीको एकता पछिको संगठन समायोजन र पदाधिकारीको कार्यविभाजनका सम्बन्धमा पनि छलफल हुनेछ ।

त्यस्तै पार्टी एकीकरणपछि विधि विधान अनुसार संघीय संसदीय दलमा संयुक्त नेता चयन हुने र प्रदेश संसदमा पनि दलका नेता चयन हुने भएकाले प्रदेश सरकारमा पर्ने असरको सम्बन्धमा पनि छलफल हुने जनाइएको छ ।