कुबेतमा मरेको भनिएको सिरहाका 'मखन सदा' जिउँदै , NRMA ले गरे उद्धार

न्यूज ब्यूरो, दुबई । बैदेशिक रोजगारीको शिलशिलामा कुबेत गएका सिरहाका एक व्यक्ति विगत करिब ३ महिनादेखि कुबेत अस्पतालमा अलपत्र परेका छन् ।

प्रदेश नं. २ को सिरहा जिल्लाको भगवानपुर गाउँपालिका वडा नं. १ बस्ने मखन सदा उर्फ प्रमोद सदा कुबेतको अस्पतालमा अलपत्र परेको बेला गैर आवासीय मधेशी संघ (एनआरएमए) को टोलीले उद्धार गरेको छ ।

गैर आवासीय मधेशी सँघका अन्तराष्ट्रिय अध्यक्ष बसन्त कुशवाहालाई सँघका एक सदस्यले पत्र मार्फत जानकारी गराएपछि सदाको उद्धारको लागि संघले टोली खटाएको हो । बैदेशिक रोजागारीको क्रममा कुबेत गएको बेला केही महिनामै एक दुर्घटनामा परी रकम अभावमा अस्पतालमै अलपत्र परेका थिए ।

गैर आवासीय मधेशी सँघका भारत शाखाका सदस्य उमेश प्रसाद रजकले अन्तराष्ट्रिय अध्यक्ष ईन्जिनीयर बसन्त कुशवाहालाई पत्राचार गरेपछि अध्यक्ष कुशवाहाले तुरुन्त एक्सन लिएका हुन् । उनको दुर्घटनापछि उनको परिवारजनलाई मृत्यूको खवर दिइएपनि मखन सदा जिउँदो अस्पतालमा रहेको खवर प्राप्त भएपछि उद्धार गरिएको हो ।

महिनौसम्म उनको परिवार र उनको सम्पर्क विच्छेद भएको थियो । उनको परिवारलाई मखन सदाको मृत्यू भईसकेको बताएपछि उनको परिवारजन सहित सिँगो टोल नै दुःखी भएको थियो । केही दिनपछि मखन सदा जिउँदो रहेको खवर पाएपछि गैर आवासीय मधेशी सँघलाई जानकारी गराएपछि उनको देखभाल अहिले सँघको रोहबरमा भइरहेको छ ।

धेरैदिनपछि पनि मखन सदासँग सम्पर्क नभएपछि उनको मृत्यू भइसकेको भनिएको थियो । तर, केही दिनपछि कुबेतको अदान हस्पिटलमा फेला परेपछि सँघले उद्धारको लागि अग्रसरता देखाएको छ ।

अत्यन्तै गरिब, लाचार, मजबुर, भूमिहिन रहेको मखन सदाको आफ्नो घर पनि छैनन् । सडकको पेटीमा सानो झोपडी बनाएर जीवनयापन गरिरहेको उनको परिवारमा ३ बालबच्चा पनि छन् ।

परिवारमा कमाउने एक मात्र मखन सदाको यस्तो हालातपछि उनको परिवार पनि बिच्चलीमा परेको छ । घरको मुख्य आसा नै गुमाएझै बनेपछि उनको परिवार टुटेको अवस्थामा पुगेको छ ।

गैर आवासीय मधेशी सँघले उनको परिवार र उनलाई आफ्नो निगरानीमा राख्ने भएको छ । उनलाई सबै जनाले मिलेर सहयोग गर्न आग्रह गरिएको छ । उनको परिवार, बालबच्चा पालनपोषणको लागि कठिनाई भएको छ ।