कोरोना कहरमा रगत अभाव हुन नदिन मिर्चैयामा रक्तदान

न्यूज ब्यूरो, सिरहा । विश्वभर महामारीको रुपमा फैलिएको कोभिड–१९ को कहरमा देखिएको रगत अभाव न्यूनिकरण गर्न मिर्चैयामा रक्तदान कार्यक्रम गरिएको छ ।

कोभिड–१९ को सङ्क्रमणको त्रासका कारण देशका विभिन्न ठाउँमा रगत सङ्कलन प्रभावित भइरहँदा मिर्चैयामा रक्तदान गरिएको हो ।

सामाजिक उत्तरदायित्व वहन गर्दै नेपाल रेडक्रससँगको सहकार्यमा जनसेवा यूवा क्लबले बिहीबार रक्तदान कार्यक्रम गरेको हो । रक्तदान कार्यक्रममा जम्मा ३९ जनाले रक्तदान गरेको क्लबका संस्थापक सुरेन्द्र यादवले जानकारी दिए ।

कोरोना सक्रमणको जोखिमलाई मध्यनजर गर्दै सामाजिक दुरी कायम गर्दै रक्तदान गरिएको थियो ।