जनकपुरः नर्स 'झा' डाक्टर बन्न खोज्दा बच्चा मारिए !

न्यूज ब्यूरो, जनकपुरधाम । जनकपुरमा एक नर्स आफैं डाक्टर बन्न खोज्दा नवजात शिशुको ज्यान गएको आरोप परिवारजनले लगाएको छ ।

जनकपुरधाम उपमहानगरपालिकाको ब्रम्हपुरी स्थित रहेको जानकी मेडिकल कलेज शिक्षण अस्पतालमा डेलिभरी गर्दा अस्पतालकी नर्स रोशी झाले बच्चा मारिदिएको आरोप लगाइएको छ ।

विहिबार (हिजो) महोत्तरीको भँगहा नगरपालिका वडा नं. ३ बस्ने खुसवु यादवलाई प्रसव पीडा हुँदा दिउँसो करिब २ बजे जानकी मेडिकल कलेजमा भर्ना भएको थियो ।

भर्ना गरिएको करिब ५/६ घण्टापछि खुसवुलाई प्रसव पीडा बढेपछि उनलाई आकस्मिक रुपमा डेलिभरी (प्रसुती) गर्नुपर्ने भनेर अस्तपाल प्रशासनले भनेपनि डाक्टरहरु भने थिएनन् ।

सोही क्रममा त्यही अस्पतालमा कार्यरत नर्स रोशी झाले डाक्टरलाई नबोलाएर आफैं प्रसुति गर्न थालेपछि बच्चा मरेको आरोप पीडित परिवारजनले लगाएको छ ।

जानकारी अनुसार, खुसबुको पेटभित्रै बच्चा उल्टो भएको तथा उनलाई अपरेशन गरी बच्चा निकाल्नुपर्ने स्थितिमा पनि नर्स झाले बिना डाक्टरको सल्लाह र हेरचाहमै आफैं गएर बच्चा निकालेकी थिइन ।

बच्चा निकाल्ने क्रममा आधी बच्चा निस्केपनि आधी भित्रै अडकिएर घाँटी च्यापिएपछि शिशुको मृत्यू भएको आरोप लगाइएको छ ।

बच्चाको मृत्यूपछि आक्रोसित भएका परिवारजनले चिकित्सक र अस्पतालको लापरवाहीले बच्चा गुमाएको भन्दै कारवाहीको माग गर्दै हल्ला गर्न थालेपछि घटना बाहिरिएको थियो ।

सोही क्रममा जनकपुरका युवा अगुवाहरु नविन यादव, प्रशान्त झा लगायतले घटनाको जानकारी पाएलगत्तै अस्पताल पुगेर घटनाबारे बुझेका थिए ।

अवस्था विग्रन थालेपछि प्रहरीलाई बोलाईएको थियो । सो क्रममा युवाहरुले नर्स झाकै कारण शिशुको ज्यान गएको बताएका छन् ।

राती प्रहरी आएर अस्पतालका प्रशासन प्रमुख डिएन झा तथा नर्स रोशी झालाई पक्राउ गरी तत्कालै जिल्ला प्रहरी कार्यालय धनुषा लगेको थियो ।

युवाहरुको आक्रोसित भीडले दुई जना उपर सुरक्षाको खतरा बढेको तथा अनुसन्धानको लागि भन्दै उनीहरुलाई तत्कालै जिल्ला प्रहरी कार्यालय धनुषा लगिएको थियो ।

यस सन्दर्भमा जिल्ला प्रहरी कार्यालय धनुषाका प्रहरी प्रवक्ता रामेश्वर कार्कीले उनीहरुलाई पक्राउ नगरिएको प्रतिक्रिया दिएका छन भने युवाहरुले उनलाई राती २ बजे नै पक्राउ गरी भ्यानमा लगिएको तस्विर र भिडियो समेत लिएका छन् ।

आज (शुक्रबार) पीडित परिवार र आरोपित नर्स तथा अस्पताल प्रशासनबीच सहमतिको लागि प्रहरीले जिप्रका धनुषामा बोलाएको युथ एक्सन फोर्सका सँयोजक प्रशान्त झाले बताए ।

यता, यस घटनामा कसैको बच्चा मरेको र त्यसको क्षतिपूर्ति कुनै हालतमा नहुने भन्दै अस्पताल प्रशासन र नर्स झालाई जसरी पनि कानुनको दायरामा ल्याउन आफूहरु जस्तोसुकै कदम उठाउने जनता समाजवादी पार्टीका युवा नेता नविन यादवले जनाए ।