जनकपुरियन युवाहरुले सोधे –“प्रहरी हाम्रो की नेताको ?”

न्यूज ब्यूरो, जनकपुरधाम । कोरोना महामारी नियन्त्रणको लागि देशको तीनै तहको सरकार असफल भएको भन्दै जनकपुरमा सरकार विरुद्ध नारावाजी गरिएको छ ।

सोही क्रममा जनकपुरका युवाहरुले तीनै तहका सरकार भ्रष्टाचारमा लिप्त रहेको आरोप लगाउँदै विरोध गर्दा प्रहरी प्रशासनले समेत आम नागरिक उपर ज्यादती गरेको आरोप लगाइएको छ ।

लामो लकडाउनका कारण आम नागरिक पिरोलिएको भन्दै कोरोनासँग लडनुको वैकल्पि विधिभन्दा लकडाउनको बहानामा भ्रष्टाचार फस्टाएको आरोप लगाएको हो ।

महामारीमा पनि तीनै तहका सरकारले बाँडी खाने भाँडोको रुपमा जनतालाई प्रयोग गरेको आरोप समेत लगाएको छ ।

युवाहरुले आज (विहिबार) साँझ विभिन्न प्रकारको बैनर, प्लेकार्ड लिएर नारावाजी गरेका हुन् ।

तरुण दल धनुषाका उपाध्यक्ष राकेश विक्रम साह, धनुषा चेम्बर अफ कमर्सका वरिष्ठ उपाध्यक्ष सरोज मिश्र लगायतका युवाहरुको अगुवाईमा सरकार विरुद्ध प्रदर्शन गरिएको हो ।

केन्द्र सरकारदेखि प्रदेश सरकार तथा स्थानीय सरकारले समेत कोरोनाको नाममा लुट मच्चाएको आरोप लगाउँदै सरकार विरुद्ध नारावाजी गरिएको हो ।