डा. सिके राउतलाई जेलबाटै रेशम चौधरीको 'फोन' !

न्यूज ब्यूरो, जनकपुरधाम । तत्कालिन स्वतन्त्र मधेश गठबन्धनका सँयोजक तथा वर्तमान जनमत पार्टीका राष्ट्रिय अध्यक्ष डा. सिके राउतलाई रेशम चौधरीले फोन गरी दुःख व्यथा सुनाएका छन् ।

राष्ट्रिय जनता पार्टी (तत्कालिन) बाट विजयी भएर साँसद बनेका रेशम चौधरी अहिले टिकापुर कैलाली घटनाको आरोपमा जेलमा रहेका छन् ।

डा. सिके राउतले आफ्नो अधिकारिक फेसबुक पेजमा उनलाई रेशम चौधरीले जेलबाटै फोन गरी जेलभित्रको व्यथा सुनाएको लेखेका छन् ।

“म प्रायः नचिनेको नम्बरबाट फोन उठाउँदिन, तर हिजो ल्यान्डलाइनबाट एउटा 'कल' आउँदा उठाउन पुगें। कारागारबाट रहेछ। मा. रेशमलाल चौधरीजीको। उहाँले भेट्न आउनु भएन भनेर जायज गुनासो गर्नुभयो। त्यसपछि उहाँले जेलका दुःख–व्यथा र आफ्नो स्वास्थ्य अवस्था बारे कुरा गर्नुभयो।”– डा. राउतको फेसबुकमा लेखिएको छ ।

साँसद रेशम चौधरीसँग कुराकानी गरेपछि उनले आफ्नो मन अशान्त भएको बताएका छन् । चौधरीले फोन राखेको २४ घण्टा वितिसक्दा पनि उनको न्यायको बारेमा मनले बेचैन बनाएको भाव प्रष्टाएका छन् ।

उनले रेशम चौधरी यो देशमा न्याय कहिले पाउने भनेर प्रश्न समेत तेर्साएका छन् । उनको हातमा हतकडी र खुट्टामा फलामे साँगलो कहिलेसम्म बाँधिरहने भनेर प्रश्न गर्दै मन अशान्त भएको बताएका छन् ।

“मा. रेशमलाल चौधरीलाई ललाईफकाई भारतबाट बोलाई सरकारलाई बुझाए बापत् वक्सिस उहाँको पार्टीले पाइसकेको छ, भोगचलन गरिसकेको छ। त्यस पार्टीले‍ उहाँलाई बचाउने कुरै भएन। आदिवासी जनजातिहरूको संगठन अझै पनि सुदृढ हुन सकेको छैन।”– उनले लेखेका छन् ।

उनले वर्तमान अवस्थामा सरकारको रंगभेद र नश्लीय संरचनात्मक विभेद विरुद्ध सम्पूर्ण आदिवासी, जनजाति, मधेशी, मुस्लिम, दलित र अल्पसंख्यकहरू सबै एकजुट भएर “रंगभेद विरुद्धको आन्दोलन” तिर अग्रसर हुनु नै अहिलेको विकल्प रहेको प्रष्टाएका छन् ।