घर भत्किँदा चार घाइते, चट्याङ (ठन्का) ले अस्पतालमा क्षति

न्यूज ब्यूरो, सिरहा । सिरहामा एकै परिवारको २ घर भत्किदाँ ४ जना घाईते भएका छन् ।

हावाहुरीले सिरहा नगरपालिका–८ स्थित दलितबस्तीका एकै परिवारको दुई घर भत्किँदा चारजना घाइते भएका छन् ।

वर्षासँगै चलेको हावाहुरीले घर भत्किँदा स्थानीय बुधावा सदायको ४५ वर्षीया श्रीमती फुनियाँदेवी, १४ वर्षीया छोरी, ११ र आठ वर्षीय दुई छोरा घाइते भएको वडाध्यक्ष नागेश्वर गोइतले जानकारी दिनुभयो । चारैजनाको स्थानीय क्लिनिकमा उपचार भइरहेको छ ।

ती परिवारलाई तत्काल बस्ने, खाने व्यवस्था मिलाउने कार्य भइरहेको उहाँले बताउनुभयो ।

यस्तै वर्षासँगै आज परेको चट्याङ लागेर लहानस्थित रामकुमार उमा स्मारक अस्पतालमा करिब १० लाखभन्दा बढीको क्षति भएको छ ।

अस्पतालको छतमा रहेको सिसी क्यामेरा र इन्टरनेट वाइफाइको राउटर जल्नाका साथै चार थान कम्प्युटर, इन्भटर तथा एक्सरे मेसिनमा क्षति पुगेको अस्पतालका मेसु डा. सुनिलकुमार कुशवाहाले जानकारी दिनुभयो ।

अस्पतालको प्रशासनिक कार्य प्रभावित भएको उहाँले बताउनुभयो ।