धनुषा: क्वारेन्टाइनको लागि विवाद, स्थानीयद्धारा तालाबन्दी !

न्यूज ब्यूरो, जनकपुरधाम । धनुषाको नगराइन नगरपालिकामा क्वारेन्टाइको सम्बन्धमा विवाद हुँदा स्थानीयहरुले तालाबन्दी गरेको छ ।

नगराईन नगरपालिका वडा नं. ७ देवडिहा स्थित रहेको समुदायिक विद्यालयमा बनाउन लागिएको क्वारेन्टाइन स्थानीयहरुले रोकेको छ ।

गाउँको नजिकै विद्यालयमा क्वारेनटाइन बनाउन लाग्दा स्थानीयहरुले रोकेको हो । उनीहरुले गाउँको क्वारेन्टाइन असुरक्षित हुने भएकोले रोकिएको बताइएको छ ।

भारतबाट आउन लागेका त्यस वडाका नागरिकहरुलाई क्वारेन्टाइनमा राख्ने नगरपालिकाको निर्णय बमोजिम समुदायिक विद्यालयमा क्वारेन्टाइनको लागि अनुकूल ठाउँ देखिएको भन्दै सोही ठाउँमा निर्माण गर्न लागिएको थियो ।

मँगलबार सरसफाई गरी आज (विहीबार) पँखा लगाउन जाँदा गाउँका केही स्थानीयहरुले कसैको ईसारामा गेटमा सामूहिक तालाबन्दी गरेको नगरपालिकाका मेयर परमेश्वर यादवले जनाए ।

मेयर यादवका अनुसार, केही ब्राम्हण समुदायका व्यक्तिहरुले केही स्थानीयलाई उक्साएर विरोध गर्न लगाएको हो । बाहिरबाट आउने वडावासीलाई उनकै वडामा राख्ने व्यवस्था अपराध हो ? उनले प्रश्न गरे ।

यता, गाउँलेहरुले सुरक्षित ठाउँ, सही सूरक्षा ब्यवस्था मिलाई गाउँको सर्वसाधारण वालवालिकाको पहूँचबाट व्यवस्थित हूने गरी आपसी सल्लाह बमोजिम क्वारेन्टाईनको उचित व्यवस्था गर्न माग गरेको छ ।

वडा नं. ७ का वडाध्यक्ष राम दुलार मुखियाका अनुसार विद्यालय गाउँबाट पर भएको तथा विद्यालयको नजिक एक जनामा मात्र घर भएको बताएका छन् । त्यो पनि विद्यालयसँगै नरहेको बताएका छन् ।

वडाध्यक्ष मुखियाले नगरपालिकाको निर्णय बमोजिम विभिन्न वडामा रहेको समुदायिक विद्यालयहरुमा क्वारेन्टाइन निर्माण गर्ने सहमति र निर्णय भएपनि केही ब्राम्हण समुदायका व्यक्तिहरुको स्वार्थका कारण सबैलाई उक्साएको बताए ।

उनले भने, विद्यालयको गाउँबाट पर भएपनि नजिकमा राम, पासवान समुदायहरुको घर पर्ने गरेको छ । ८ कोठामा निर्माण गर्ने भनिएको क्वारेन्टाइनको लागि पँखा सेट गर्न जाँदा केही कथित व्यक्तिहरुले रोकेको बताएका छन् ।