प्रदेश २ः पछिल्लो २४ घण्टामा ५६ जनामा कोरोना पुष्टि

न्यूज ब्यूरो, जनकपुरधाम । पछिल्लो २४ घण्टामा यस प्रदेश नम्वर २ मा ५६ जना ब्यक्तिहरुमा कोरोना संक्रमणको पुष्टि भएको छ ।

जसमा रौतहट जिल्लामा ३५ जना, बारा जिल्लामा ८ जना, सप्तरी जिल्लामा ११ जना र सिराहा जिल्लामा २ जना कोरोना संक्रमण पुष्टी भएको हो ।

रौतहट जिल्लाको देवाही गोनाही नगरपालिका वडा नम्वर ७ र ८ का क्रमसः २१ बर्षिय र ३५ बर्षिय पुरुष, सोही जिल्ला स्थित गौर नगरपालिकामा रहेको जुद्धोदय माध्यमिक विद्यालयको क्वारेन्टाईनमा रहेको ८ जना पुरुष, त्यसैगरी कठहरिया नगरपालिकाका वडा नम्वर ३ का क्रमष ३६ र ३७ बर्षिय पुरुषहरु र इसनाथ नगरपालिकाको जोकाहा स्थित मस्तिजमा निर्माण गरिएको क्वारन्टाईनमा रहेका बर्ष १३ र ३५ बर्षिय पुरुष तथा सोही नगरपालिकाको श्री जनता माध्यमिक विद्यालयको क्वारेन्टाईनमा रहेका क्रमसः १७ बर्ष, १९ बर्ष र २० बर्षमा ३ जना तथा २१, २२, २४, २७, ३४, ३८, ३५, ४८ र ५० बर्षिय पुरुषहरुमा कोरोना संक्रमणको पुष्टि भएको हो । रौतहट जिल्लामा संक्रमण पुष्टि भएका उल्लेखित ब्यक्तिहरु छिमेकी मुलुक भारतका विभिन्न स्थलहरुबाट नेपाल आएको बुझिएको छ ।

बारा जिल्लाको पचरौता नगरपालिका वडा नम्वर १ मा रहेको क्वारेन्टाईनमा गरिएको स्वाव संकलनको परिक्षण पश्चात १ महिला र ७ जना पुरुषहरुमा कोरोना संक्रमणको पुष्टि भएको छ । जसअनुसार रौतहट जिल्ला घर भई बारा जिल्लामा बस्दै आएकी ५२ बर्षिय महिलामा कोरोना संक्रमण पुष्टी भएको हो । त्यसैगरी पचरौता वडा नम्वर १ को क्वारेन्टाईनमा रहेका क्रमस २२, २९, ३०, ३५, ३८, ४० र ४१ बर्षिय पुरुषहरुमा कोरोना संक्रमको पुष्टि भएको हो ।

मिडिया ब्रिफिँगको पूर्णपाठ सहित

बारा जिल्लामा संक्रमण पुष्टि भएकी ५२ बर्षिय महिला बाहेकका ७ जना पुरुषहरु पनि छिमेकी मुुलुक भारतको विभिन्न स्थानबाट आएको बुझिएको छ ।

सिराहा जिल्लामा संक्रमण पुष्टी भएका क्रमस ३५ र ३९ बर्षिय पुरुषहरुको स्थायी ठेगाना सप्तरी जिल्लाको रुपनी गाउँपालिका र ओखलढुंगा जिल्लाको सिद्धिचरण नगरपालिका रहेको खुल्न आएको छ र दुवै जना पुरुषहरु पेशागत कार्यका लागि हाल सिराहामा बस्दै आएको बुझिएको छ ।

सप्तरी जिल्लामा भने बलान बिहुल गाउँपालिकामा १७ बर्षिय महिला र २९ बर्षिय पुरुष, बोधेबर्साइन नगरपालिकामा क्रमस १८ बर्षको १ जना, १९ बर्षका २ जना, २० बर्षका २ जना तथा २१, २८ र ५१ बर्षका पुरुषहरुमा कोरोना संक्रमण पुष्टि भएको छ । त्यसैगरी सप्तरी जिल्लाकै सुरुङ्गा नगपालिकामा २९ बर्षिय पुरुषमा समेत कोरोना संक्रमणको पुष्टि भएको हो ।

पछिल्लो २४ घण्टामा संक्रमित भएका ५६ जनासँगै यस प्रदेशमा हालसम्म कोरोना संक्रमण पुष्टि भएका ब्यक्तिहरुको कुल संख्या ३ सय २४ पुुगेको छ ।

पछिल्लो २४ घण्टामा संक्रमण पुष्टि भएका तथा यस प्रदेश संक्रमण देखिएका अधिकांस ब्यक्तिहरु यूवा उमेर समुहका रहेका छन् ।

अन्तर्राष्ट्रिय देशहरुमा पनि सवैभन्दा बढी यूवा उमेर समुहका मानिसहरुमा नै संक्रमण बढी देखिएको छ । आवत जावत र हिँडडुल बढी गर्ने उमेर समुह भएका कारण यूवाहरुमा कोरोना संक्रमण बढी हुनु स्वाभाविक नै हो ।

तर अन्तर्राष्ट्रिय देशहरुमा कोरोना संक्रमणबाट हुने मृत्यूदरमा भने सवैभन्दा बढी जेष्ट नागरिक र दीर्घरोगबाट पीडितहरु बढी रहेका छन् । यसरी युवा उमेर समुहबाट नै संक्रमण बढी फैलने जोखिम रहे पनि यसको सवैभन्दा बढी असर जेष्ट नागरीक र दीर्घरोगबाट पीडितहरुले झेल्नु परिरहेको छ ।

तसर्थ छिमेकी मुलक भारत वा जोखिमपूर्ण कुनै पनि स्थलबाट आएकाहरुलाई उच्च सतर्कता र सावधानी अपनाउँदै स्थानीय क्वारेन्टाईनमा बसिदिनुहुन हार्दिक अनुरोध गर्दछौं । क्वारेन्टाईनमा नबसेर सिधै आफ्नो घर परिवारमा जाँदा आफ्नो परिवारका जेष्ठ सदस्य, दीर्घरोगी र वालवालिकाहरुलाई गम्भिर असर पर्न सक्छ ।

आफ्नो परिवार, समुदाय र समाजलाई सुरक्षित राख्ने वा आफ्ना मित्रजन र प्रीयजनहरुको सुस्वास्थ्य चाहने हो भने क्वारेन्टाईनमा बस्नु पर्ने आवश्यकता र अनिवार्यतालाई सवैले पालना गरिदिनुहुन अनुरोध गर्दछु ।

यस प्रदेश नम्वर २ मा कोरोना संक्रमण उच्च हुँदै गएपछि थप जोखिमहरु पनि बढेर गएका छन् । तर यसको सँगसँगै आसालाग्दा संभावनाहरु पनि देखिएका छन् ।

नेपालमा कोरोना जित्न सफल भएकाहरुको अधिकांस संख्या यसै प्रदेशमा रहेको छ । नेपालमा हालसम्म १ सय ५५ जनाको उपचार पश्चात कोरोना संक्रमण निको भएर अस्पतालबाट डिस्चार्ज भएको तथ्याकं छ । जसमा ९३ जना ब्यक्तिहरु यस प्रदेशबाट नै डिस्चार्ज भएका छन् ।

यस प्रदेशमा डिस्चार्ज भएका ९३ जना ब्यक्तिहरु नारायणी अस्पताल र गण्डक अस्पताल बीरगंज पर्साबाट डिस्चार्ज भएका हुन् । आत्मबल, समयमै सतर्कता र चेकजाँच तथा उपचारबाट कोरोनासंक्रमण मुक्त हुन सकिन्छ भन्ने तथ्य अस्पतालबाट डिस्चार्ज भएका ब्यक्तिहरुको उमेर समुह र अवस्थाले स्पष्ट पारेको छ ।

विशेषगरी बीरगंजको नारायणी र गण्डक अस्पतालमा भर्ना भएका केही संक्रमितहरु उच्च रत्तचाप र मधुमेह जस्ता रोगहरुबाट समेत पीडित रहेका थिए भने उमेर समुहका हिसावले शिशु समेत संक्रमित भएको अवस्था थियो । तर दीर्घ रोगबाट पीडित तथा शिशु समेतले कोरोना जितेर स्वस्थ हुनु आफैंमा सुखद पक्ष हो ।

यसो भनिरहँदा हामीले उच्च सतर्कता र सावधानी भने कायम नै राख्न सक्नुपर्छ । यस २ नम्वर प्रदशेमा २०७७ साल बैशाख १४ गते २ जना संक्रमितहरु उपचार पश्चात निको भएर डिस्चार्ज भएका थिए ।

पछिल्लो समय २०७७ साल जेठ १० गते ९ जना र ११ गते १८ जना १२ गते ४३ जना र हिजो अर्थात २०७७ साल जेठ १३ गते गण्डक अस्पताल बीरगंज पर्साबाट २१ जना उपचार पश्चात डिस्चार्ज भएका छन् ।

त्यसैगरी PCR परिक्षण मार्फत संक्रमण प्रमाणित भएका सप्तरी जिल्ला स्थित गजेन्द्र नारायण सिंह सगरमाथा अस्पतालको आइसोलेसन कक्षमा १४ पुरुष र १ महिलागरी कुल १५ जना कोरोना संक्रमितहरुको उपचार भइरहेको छ । सिराहा जिल्ला महेन्द्र गेनाई अस्पतालको आइसेलसन कक्षमा कोरोना संक्रमित ६ जना पुरुषहरुको उपचार भइरहेको छ । त्यसैगरी धनुषा जिल्ला स्थित प्रादेशिक अस्पताल जनकपुरको आइसोलेसन कक्षमा २ महिला र २४ पुरुषगरी कुल २६ जना कोरोना संक्रमितहरुको उपचार भइरहेको छ । महोत्तरी जिल्लाको जलेश्वर अस्पतालको आइसोलसन कक्षमा ३ जना कोरोना संक्रमितहरुको उपचार भइरहेको छ । सर्लाही जिल्ला मंलगवामा रहेको अल्पामाई रामनारायण यादव नर्सिङ्ग कलेजको आइसोलेसन कक्षमा कोरोना संक्रमित १३ जना पुरुषहरुको उपचार भइरहेको छ ।

रौतहट जिल्लामा रहेको गौर नर्सिङ्ग इन्टिच्यूटको आइसोलेसन कक्षमा ३ महिला र २५ पुरुषगरी कुल २८ जना, रौतहट जिल्लाकै राजपुर फरहदवामा रहेको प्राथमिक स्वास्थ्य केन्द्रको आइसोलेसन कक्षमा २५ जना पुरुष र रौतहट जिल्लाको देवाही गोनाही नगरपालिका स्थित देवाही गोनाही पोलिटेक्निक ईन्स्टिच्यूट धरहरीमा १४ जना पुरुष कोरोना संक्रमितहरुको उपचार भइरहेको छ । बारा जिल्लाको कलैया अस्पतालको आइसोलेसन कक्षमा ३८ जना पुरुष र १ जना महिलागरी ३९ जना संक्रमितहरुको उपचार भइरहेको छ । पर्सा जिल्लामा २ महिला र ७ जना पुरुष गरी कुल ९ जना कोरोना संक्रमितहरुको बिरगंज महानगरपालिका स्थित गण्डक अस्पतालको आइसोलेसन कक्षमा उपचार भइरहेको छ ।

त्यसैगरी सप्तरी जिल्लाको गजेन्द्र नारायणशिंह सगरमाथा अस्पतालमा ३ जना, सिराहा अस्पताल सिराहामा ७ जना, बारा जिल्ला स्थित कलैया अस्पतालमा २ जना, बारा जिल्ला स्थित जितपुर उपमहानगरपालिकामा रहेको कोभिड १९ अस्थाई अस्पतालमा ५ जना, प्रादेसिक अस्पताल जनकपुरमा ५ जना र महोत्तरी जिल्लाको जलेश्वर अस्पतालमा ३ गरी कुल २५ जना कोरोना आसंकीत बिरामीहरुको आइसोलेसन कक्षमा राखेर उपचार भइरहेको छ ।