नगरपालिकाले ल्याइदिए नगरवासीको औषधी

न्यूज ब्यूरो, जनकपुरधाम । लकडाउनका कारण बाहिर निस्कन नपाएका तथा औषधी उपचारको लागि समेत कठिनाई महसुस गरिएको बेला शहिदनगर नगरपालिकाले औषधी ल्याइदिएको छ ।

धनुषाको शहिदनगर नगरपालिकाले लकडाउनका कारण दीर्घरोगीहरु प्रभावित भएपछि उनीहरुको लागि औषधी ल्याएर वितरण गरेको हो ।

नगरपालिकाका नगर प्रमुख उदय कुमार बरबरिया (यादव) ले नगरभित्र रहेका नगरभरि रहेका दीर्घरोगीहरुको लागि औषधी ल्याएर वितरण गरिएको बताएका छन् ।

दीर्घरोगीहरुको लागि औषधी नगरपालिकाले निःशुल्कमै किनेर ल्याइदिएपछि उनीहरु खुसी भएका छन् ।

गत बैशाख १३ गते मेयर बरबरियाले एक सूचना जारी गर्दै दीर्घ रोगीहरुलाई आ–आफ्नो तथ्याँक सँकलनको लागि सूचना सार्वजनिक गरेका थिए ।

लकडाउनमा दीर्घ रोगीहरुको पनि औषधी नगरपालिकाले ल्याउँछ : मेयर बरबरिया

जसमा डायबिटिज, हाई ब्लडप्रेसर, क्यान्सर, दम, पारालायसिस लगायतका रोगीहरुको लागि औषधी ल्याएर आईतबार (आज) वितरण गरिएको जनाइएको छ ।

नगरपालिकाका स्वास्थ्य शाखा सँयोजक कपिलदेव अधिकारीका अनुसार, सूचना र जानकारी सार्वजनिक गरिएपछि तोकिएको अवधीभित्र आफ्नो औषधी लेखाएकाहरुको लागि औषधी ल्याइएको हो ।

लकडाउनका कारण जनकपुर वा बाहिरबाट ल्याउनुपर्ने औषधी एक महिनाको लागि ल्याइएको बताइएको छ । त्यसपछि अर्को निर्णय गरिने जनाइएको छ ।

दीर्घरोगीहरुको लागि औषधी नगरपालिकाले निःशुल्कमै किनेर ल्याइदिएपछि उनीहरु खुसी भएका छन् । औषधी लिँदै वृद्धहरुले नगर प्रमुख बरबरिया र स्वास्थ्य समितिका पदाधिकारीहरुलाई धन्यवाद र आशिर्वाद दिएका थिए ।