नगरपालिकाका जनप्रतिनीधिलाई बदनाम गर्न खोजिए : मेयर सिँह

न्यूज ब्यूरो, जनकपुरधाम । प्रदेश नं. २ को सप्तरी बोदे बरसाईन नगरपालिकाका मेयर आतेश कुमार सिँह (यादव) ले केही जनाले आफूहरुको गलत प्रचारवाजीमा लागेको बताएका छन् ।

बोदे बर्साइन नगरपालिका– ६ का अध्यक्ष जयराम साहका छोरा भारतको नयाँ दिल्लीबाट गत बुधबार राती आएपनि उनलाई क्वारेन्टाइनमा नहालेको भनेर गलत प्रचारवाजी गरेको भन्दै समाचारलाई खण्डन गरेका छन् ।

केही सँचारमाध्यमहरुमा आएको समाचार र समाजिक सँजालमा गरिएको टिकाटिप्पणी गरेको भन्दै मेयर सिँहले आफू स्वयंम गएर उनलाई क्वारेन्टाइनमा राखेको दाबी गरेका छन् ।

केही सँचारमाध्यमहरुमा वडाध्यक्षले आफ्नो छोरालाई क्वारेन्टाइनमा नपठाएर घरमै राखेको भनेर समाचारहरु प्रकाशित भएपछि मेयर सिँहले त्यस्तो केही नभएको तथा सुरक्षाकर्मीले क्वारेन्टाइनमा राख्न नमानेपछि आफू गएर समन्वय गरी राखेको बताएका हुन् ।

मेयर सिँहले आफ्नो फेसबुक मार्फत नेपाल भारत सीमा क्षेत्र दशगजा क्षेत्रमा अपलत्र परेका आफना नागरिकलाई आफै उद्धार गरी ल्याएको बताउँदै बाहिरबाट आउने सबैलाई अनिवार्य क्वारेन्टाइनमा राख्ने गरेको बताएका छन् ।

उनले केही जनाले समाजिक सँजालमा बिना जानकारीको जथाभावी लेखेको भन्दै सँचारकर्मीहरुलाई यथार्थ सत्य तथ्य बुझेर मात्र लेख्न आग्रह गरेका छन् ।

उनले महामारीको समयमा पनि संवेदनशिल भएर समाचार सूचना प्रकाशन गर्न अनुरोध समेत गरेका हुन् ।