सीमा समस्या समाधान गर्न हामी सरकारसँग साथ छौं : राज्यमन्त्री मण्डल

न्यूज ब्यूरो, जनकपुरधाम । प्रदेश नं. २ का उद्योग, पर्यटन, वन तथा वातावरण राज्यमन्त्री सुरेश मण्डलले देशको सीमा विवाद समाधानको लागि आफूहरु सरकारको साथ रहेको बताएका छन् ।

उनले आफनो समाजिक सँजाल फेसबुकमा कालापानी, लिपुलेक र लिम्पियाधुराको बारेमा लेख्दै झण्डै दुई तिहाईको सरकारले भारतसँग वार्ताको माध्यमबाट सीमा समाधानको लागि सरकारले कदम चाल्नुपर्ने बताएका छन् ।

मधेशवादी दलहरुले सीमाबारे केही नबोलेको भन्दै आरोप लगाउँदा मन्त्री मण्डलले सीमा विवाद बारेमा सरकारले चासो लिनुपर्ने र परराष्ट्र मामिला अन्तर्गत परेकोले संवादको मार्फत सीमा समाधान गर्नुपर्ने धारणा राखेका हुन् ।

न्यूज ब्यूरोसँग कुराकानी गर्दै राज्यमन्त्री मण्डलले भने, यो संघीय सरकारको मामिला हो, परराष्ट्रको मामिला हो, संवादको मार्फतबाट पटक पटक विवाद गर्नुभन्दा एकैपटक समाधान तर्फ जानुपर्छ । हामी सरकारको साथ छौं । भारतसँग संवाद गरी सीमा समाधान समयमै हुनुपर्छ । जनता समाजवादी पार्टी सीमाको मामिलामा नेपाल सरकारसँग सदैव साथ छ र रहनेछ ।”

उनले नेपाल सरकारले भारतसँग प्रष्ट रुपमा संवाद वा प्रेस नोट मार्फत कि त फिर्ता हुन कि त युद्ध गर्नको लागि भन्न सक्नुपर्ने बताएका छन् ।

उनले १ लाख नेपाली सेनालाई अब बोर्डरमा पठाउनुपर्ने धारणा व्यक्त गरेका छन् । सेनालाई नेताहरुको सुरक्षामा मात्र नभई सीमा सुरक्षाको लागि पनि पठाउनुपर्ने धारणा राखेका छन् ।

सेनालाई सलामी, मलामी र ठेकेदारीबाट फुर्सद दिएर सीमामा समेत तैनाथ गर्नुपर्ने धारणा राखेका हुन् ।

उनले पटक पटक भारतले सीमा मिचेको भनेर भनेपनी सरकारले केही नगरेको अब पनि देशमा सरकार भएको अनुभूति दिलाउन आग्रह गरेका छन् ।

उनले आफ्नो फेसबुकमा लेखेका छन् : “जिन्दगी भर कालापानी, लिपुलेक र लिम्पियाधुराको नाममा तत क्षेत्रका जनताको भोट लिएका झण्डै दुई तिहाईको कम्युनिष्ट सरकारको प्रधानमन्त्रीले भारतसंग संवाद या प्रेस मार्फत प्रस्ट रुपमा भन्न सक्नुपर्छ कि त फिर्ता होऊ कि त युद्ध गर । १ लाख नेपाली सेनालाई सलामी,मलामी र ठिकदारीबाट फुर्सद देऊ । उसको असली अनुहार सामने आउन देऊ । बासमती चामल, खसीमासु र देसी घ्यूको काम लगाऊ । सिमामा तैनात गर । आमने सामने होऊ । वार्ता या युद्ध गर । समस्या समाधान गर । सरकार भएको अनुभूति देऊ । जय देश,जय मधेस ।”