विश्वसनीयतामा प्रश्न उठे पनि आरडीटी टेस्ट रोक्दैनौं : स्वास्थ्यमन्त्री

न्यूज ब्यूरो, काठमाडौं । स्वास्थ्य तथा जनसंख्यामन्त्री भानुभक्त ढकालले विश्वसनीयतामा प्रश्न उठे पनि र्यापिड डाइग्नोस्टिक टेस्ट (आरडीटी) विधिबाट कोरोना एन्टीवडी परीक्षण नरोकिने बताएका छन् ।

सोमबार संघीय संसदको राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको वैठकमा उनले आरडीटी विधिको विश्वसनीयता र कमजोरीमा ध्यान दिँदै निरन्तरता दिने बताएका हुन् ।

समिति बैठकमा नेपाली कांग्रेसका सांसद डा. मिनेन्द्र रिजाललगायतले आरडीटी विधिको परीक्षणमा प्रश्न उठेको भन्दै रोक्न सुझाव दिएका थिए । तर मन्त्री ढकालले आरडीटी परीक्षण रोक्न नसकिने जवाफ दिए ।

क्वारेन्टाइनमा रहेका, क्वारेन्टाइनमा निश्चित अवधि पार गरेका, तत्कालका लागि आशंकाबाट मुक्त हुनका निम्ति र्यापिड टेष्टलाई प्रयोग गरेको मन्त्री ढकालको जवाफ छ ।

कोरोना संक्रमण भएको वा नभएको तत्काल छुट्याउन (आरडीटी) विधिबाट कोरोना परीक्षण सहज भइरहेको उनले बताए ।