सर्लाहीको जंगलमा वन्यजन्तु मार्न खोज्ने तीन पक्राउ

न्यूज ब्यूरो, सर्लाही । सर्लाहीमा वन्यजन्तु मार्न खोज्ने तीन जना पक्राउ परेका छन् ।

सर्लाहीको वागमति नगरपालिका–१० शंकरपुरको जंगलमा वन्यजन्तु मार्न पासो थाप्दै गरेका तीन जनालाई प्रहरीले पक्राउ गरेको हो । पक्राउ पर्नेमा वाग्मती नगरपालिका–४ का चन्द्रबहादुर ब्लोन, नगरपालिका–२ का सन्देश मोक्तान र त्यहीका भीमबहादुर डिमडुम रहेका छन् ।

आइतबार दिउँसो जङ्गली वन्यजन्तु मार्न पासो थाप्दै गरेको अवस्थामा सव डिभिजन वन कार्यालय मूर्तियाबाट खटिएको सशस्त्र वन रक्षकको टोलीले उनीहरुलाई पक्राउ गरेको थियो । वन रक्षक टोलीलाई देखेर अन्य शिकारी भागेका छन् ।

सशस्त्र वन रक्षक टोलीले घटनास्थलबाट ठूलो परिमाणमा वन्यजन्तु मार्न प्रयोग गरिने पासो र बा ७० प ३५७८ नम्बरको पल्सर मोटरसाइकल बरामद गरेको छ । पक्राउ परेका तीनै जनालाई सव डिभिजन वन कार्यालय मूर्तियामा राखेर थप अनुसन्धान भइरहेको जनाइएको छ ।

लकडाउनको समयमा सर्लाहीको जङ्गलमा वन्यजन्तुको चोरी शिकार गर्ने क्रम बढेको छ ।