महोत्तरीमा अज्ञात रोगबाट ११ जनाको मृत्यु, डब्ल्यूएचओको टोली बस्तीमा

न्यूज ब्यूरो, महोत्तरी । महोत्तरीमा अज्ञात कारण थप दुई जनाको मृत्यु भएको छ ।

योसँगै थाहै नभएको रोगका कारण मृत्यु हुनेको संख्या ११ पुगेको छ । शनिबार बर्दिवास १२ स्थित इटाभट्टामा काम गर्ने ५५ वर्षीय भारतीय मोतिलाल प्रजापति र भंगाहा ६ जमुनियाँका ४८ वर्षीय पलट साहको मृत्यु भएपछि अज्ञात रोगबाट मृत्यु हुनेको संख्या ११ पुगेको हो ।

जिल्ला प्रहरी कार्यालयका अनुसार बर्दिवास १२ मेघरोल र भंगाहा ७ मेघनाथ गोरहन्नामा गत मंगलबारदेखि मंगलबारसम्म ८ जनाको मृत्यु भइसकेको छ । तीमध्ये बर्दिवास १२ का चार, भंगाहा ७ का ६ र भंगाहा ६ का एक जना छन् ।

ती तीनै वडाका बस्ती आपसमा जोडिएका छन् । भंगाहा नगरपालिकाका प्रमुख सञ्जीवकुमार साहले विषाक्त घरेलु मदिरा पिएका कारण उनीहरूको मृत्यु भएको हुन सक्ने प्रारम्भिक अनुमान गरिएको बताए ।

बर्दिवास नगरपालिकाका प्रमुख विदुरकुमार कार्कीले शव परीक्षणको नतिजा आएपछि मात्र मृत्युको कारण निर्क्योल गर्न सकिने जानकारी दिए ।

विश्व स्वास्थ्य संगठनसहितको टोली बस्तीमा

अनुसन्धानका लागि इपिडिमियोलोजी तथा रोग नियन्त्रण महाशाखाका डा. अमृत पोखरेल, विश्व स्वास्थ्य संगठनकी डा. सुदीपा खड्कासहित महोत्तरी जिल्ला स्वास्थ्य कार्यालयको टोली अहिले पीडित बस्तीमा पुगेको छ ।

टोलीले बिरामीका लक्षणबारे पाएको जानकारी र अन्य पक्षबाट समेत अनुसन्धान गरिरहेको डा पोखरेलले जानकारी दिए ।

मृतकमध्ये सिकेन्द्र सिंह र सुकदेव (सिताई) महराको शव परीक्षण गरिएको छ । रिपोर्ट आएपछि मृत्युको कारणबारे यकिन हुने जिल्ला प्रहरी कार्यालयका प्रमुख तथा प्रहरी उपरीक्षक श्यामकृष्ण अधिकारीले जानकारी दिए ।

कोरोनाको पनि आशंका

यसैबीच कतै कोरोना संक्रमण पो हो कि भन्ने आशंकाले परीक्षणका लागि मृतकमध्ये दुई जनाको स्वाब संकलन गरी प्रयोगशाला पठाइएको महोत्तरी जिल्ला प्रहरी कार्यालयले जनाएको छ ।

‘मृतकको आरडीटी जाँच परिणाम नेगेटिभ आएको छ,’ प्रहरी उपरीक्षक अधिकारीले भने, ‘अब पीसीआर परीक्षणको रिपोर्ट आएपछि यकिन हुनेछ ।’

ती बस्तीमा थारु, मुसहर, चमार, बाँतर (सर्दार) सहितका जनजाति र दलित समुदायको सघन बसोबास छ ।