अस्थिरताका प्रयास गरिनु दुःखद् : प्रधानमन्त्री ओली

न्यूज ब्यूरो, काठमाडौं । प्रधानमन्त्री केपी शर्मा ओलीले अप्ठ्यारो परिस्थितिको मौका छोपेर अस्थिरताका प्रयास गरिनु दुःखद् भएको बताएका छन् ।

अन्तराष्ट्रिय श्रमिक दिवसका अवसरमा शुक्रबार शुभकामना दिँदै प्रधानमन्त्री ओलीले नेकपाभित्र आफूलाई प्रधानमन्त्रीबाट हटाउन भइरहेको प्रयासप्रति संकेत गर्दै यस्तो अभिव्यक्ति दिएका हुन् ।

‘आज नेपालका केही सञ्चारमाध्यम र सामाजिक सञ्जालमा पनि स्थिरता, स्थायित्व र विकासका विरुद्ध देशलाई अस्थिरतातर्फ धकेल्ने प्रकृतिका प्रयासको समाचार सम्प्रेषण र चर्चा भइरहेको देखिन्छ,’ ओलीले भनेका छन्, ‘एकातिर सम्पूर्ण नेपाली जनता र सिङ्गै विश्व कोरोना महामारीविरुद्ध लडिरहेको अवस्था छ, अर्कातिर यही अप्ठ्यारो परिस्थितिलाई मौका छोपेर अस्थितरताका त्यस्ता प्रयास गरिनु दुःखद् कुरा हो ।’

प्रधानमन्त्रीको सन्देशमा भनिएको छ, ‘आफ्ना ससाना स्वार्थ वा कुनै गलत उद्देश्यका साथ कसैले यस परिस्थितिलाई बिथोल्न र बिगार्न खोज्छ भने सरकार, नेकपाका कार्यकर्ता र आम नेपाली जनतालाई यो किमार्थ स्वीकार्य हुँदैन । त्यस्ता प्रयासलाई सफल हुन दिइने छैन भन्नेमा म सबैलाई आश्वस्त पनि पार्न चाहन्छु ।’