गौचन र तिवारी हत्याका दुई अभियुक्त पक्राउ

चितवन, ९ माघ : निर्माण व्यवसायी महासंघका अध्यक्ष शरदकुमार गौचन र युवा संघ रुपन्देहीका अध्यक्ष दुर्गा तिवारीको हत्यामा संलग्न दुई अभियुक्तलाई प्रहरीले पक्राउ गरेका छन् ।
प्रहरीले उनीहरुलाई विभिन्न स्थानबाट पक्राउ गरेका हुन् ।
गौचन र तिवारी हत्याको अभियोगमा श्याम लामा गुम्बेलाई प्रहरीले सोमबार साँझ चितवनबाट पक्राउ गरेको छ ।

प्रहरीको केन्द्रीय अनुसन्धान ब्युरो ९सिआइबी० को टोलीले मुख्य गोली हान्ने गुम्बेलाई पक्राउ गरेको बताइएको छ ।

सिआइबीका प्रमुख प्रहरी नायब महानिरीक्षक पुष्कर कार्कीका अनुसार, अभियुक्त गुम्बेलाई भरतपुर महानगरपालिका वडा नं ६ गीतानगरबाट पक्राउ गरिएको हो ।

कार्कीले गौचन र तिवारीको दुवै घटनामा निज लामा संलग्न भएको बताउँदै केही दिनयता सिआइबीको टोलीले लामाको फलोअप गर्दै आएको थियो ।

जिल्ला प्रहरी कार्यालय चितवनका प्रमुख प्रहरी उपरीक्षक दीपक थापाले सोमबार साँझ अबेर निजलाई पक्राउ गरी सिआइबीले राति नै लामालाई काठमाडौँ लगेको बताए ।

देशकै मध्यभाग भएकाले आपराधिक क्रियाकलापपछि अन्यत्र जान सहज होस् भन्नाका लागि अपराधी लुक्न चितवन आउने गरेको थापाले थपे ।

गौचन हत्याकाण्डका प्रमुख योजनाकार समीरमानसिंह बस्नेतसहित अन्यलाई प्रहरीले यसअघि नै पक्राउ गरिसकेको छ ।

व्यवसायी गौचनको गत असोज २३ गते काठमाडौँ शान्तिनगरमा गोली हानी हत्या भएको थियो । उनलाई मोटरसाइकलमा आएका व्यक्तिले गाडीमा गोली प्रहार गरेका थिए ।

यस्तै, तिवारीको रुपन्देही र नवलपरासीको सिमानामा पर्ने खैरहनी भन्ने स्थानमा गत वर्ष पुसमा गोली प्रहार भएको थियो । देब्रे कोखामा गोली लागेका उनको रुपन्देही देवदह मेडिकल कलेजमा उपचारका क्रममा मृत्यु भएको थियो ।