जनकपुरबाट लकडाउनमा पसल खोल्ने एक व्यापारी पक्राउ

न्यूज ब्यूरो, जनकपुरधाम । कोरोनाको सँक्रमण रोकथामको लागि सरकारले लगाएको लकडाउनमा पनि पसल सँचालन गरेको भन्दै एक जनालाई पक्राउ गरेको छ ।

जिल्ला प्रहरी कार्यालय धनुषाले जनकपुरधाम उपमहानगरपालिका वडा नं. ४ मुरली चोकबाट एक कपडा पसलेलाई पक्राउ गरेको हो ।

जनकपुरधाम उपमहानगरपालिका वडा नं. ९ बस्ने बर्ष ३८ को सुरेन्द्र गुप्तालाई आज दिउँसो ३ बजे पक्राउ गरिएको जिल्ला प्रहरी कार्यालय धनुषाले जनाएको छ ।

जिल्ला प्रहरी कार्यालय धनुषाका प्रहरी प्रवक्ता एवम् डिएसपी रामेश्वर कार्कीका अनुसार लकडाउन भएको बेला पनि पसल सँचालन गरी लकडाउनको उलंघन गरेको भन्दै पक्राउ गरिएको हो ।

यसका साथै, जनकपुरमा पसल सँचालन बारे कुनै प्रकारको निर्णय नभएको प्रवक्ता कार्कीले न्यूज ब्यूरोलाई बताउनुभयो ।

केही व्यापारीहरुले जनकपुरमा केही समयको लागि दैनिक रुपमा पसल सँचालन गर्न दिने निर्णय र अनुमति दिएको भन्दै हल्ला मात्र गरेको बताउनुभयो ।

प्रवक्ता कार्कीले लकडाउनलाई अझै कडा बनाउने तर्फ प्रहरी प्रशासन अग्रसर भएको बताउनुभयो ।

उहाँले अत्यावश्यक पसल बाहेक कुनै पनि पसल खोल्न नदिने बताउनुभयो । उहाँले औषधी पसल र खाद्यान्न बाहेक कुनै पनि पसल खोल्न बर्जित गरेको बताउनुभयो ।

बुधबारसम्म १६ जनामा कोरोना सँक्रमण पुष्टि भएको छ भने थप ४ जनामा रयापिट टेस्ट पोजिटिभ देखिएपछि लकडाउन झन कडा बनाउने भएको छ ।