सिरहामा राहत वितरण विषयमा दोहोरो झडप, ८ घाइते, २ रिफर

न्यूज ब्यूरो, सिरहा । सिरहाको मिर्चैया नगरपालिकामा राहत वितरणको विषयलाई लिएर दुई पक्षबीच दोहोरो झडप भएको छ ।

मिर्चैया नगरपालिका २ मल्हनियाँस्थित सोमबार बेलुकी नगरपालिकाका मेयर श्रवण कुमार यादव र एक अर्को पक्षबीच झडप भएको हो । झडपमा एक वडाध्यसहित आठ जना घाइते भएका छन् ।

घाइते मध्ये गम्भीर रहेका अर्का पक्षका अमोद यादवसहित २ जनालाई बिराटनगर रिफर गरिएको छ भने सोही पक्षका दुईजनाको मिर्चैयामा उपचार भइरहेको छ । यस्तै, वडा २ का वडाध्यक्ष लक्ष्मेश्वर कापरसहित त्यस पक्षका दुईजना सामान्य उपचारपछि घर फर्किएका छन् ।

मेयर पक्षका पनि जम्मा चारजना घाइते भएकामा दुई जनालाई सामान्य चोट लागेको छ । अर्का पक्षका घाइते अमोदको भने हात, खुटट र ढाँडमा बढी चोट लागेको छ । उनी कांग्रेसका हुन् ।

विश्वभर महामारीको रुपमा फैलिएको कोरोना भाइरस (कोभिड १९) रोकथामका लागि सरकारले गरेको लकडाउनबाट प्रभावित वडा २ र ३ का दलित परिवारहरुले केहि दिनअघि अमोदसँग राहत दिलाइदिन अग्रह गरेका थिए । लकडाउनमा छाक टार्नसमेत मुस्किल भएपछि उनीहरुले अमोदलाई गुहारेका थिए ।

नगरपालिकाबाट कुनै चाँसो नदेखिएपछि अमोदले निजी खर्चमा उनीहरुलाई खाद्यान्न उपलब्ध गराउने बाचा गरे । खाद्यान्न सामाग्री किनेर आइतबार अमोदसहित नेकपाका प्रदेश सांसद दिलीप साह, तत्कालिन एमालेबाट मेयरका प्रत्यासी प्रदीप महासेठ लगायतका राहत बाँड्न दलित बस्ती पुगे ।

आफूहरु त्यहाँ पुगेको थाहा पाएपछि मेयर र उनका मान्छेहरु राहत वितरण गर्न नदिएको अमोदले बताए । वितरण गर्न लगिएको खाद्यान्न सामाग्री वितरण गर्न नदिएर फाल्न खोजेपछि त्यहाँ हिजो पनि विवाद भयो ।

आफ्नो वडामा अरुलाई राहत बाँड्न नदिने भन्दै वितरण गर्न नदिएको अमोदले सुनाए । उनीहरु गएपछि मात्रै त्यहाँ राहत बाँडिएको तरुण दलका धनेश्वर यादवले जनाए । आज मेयर यादव र वडाध्यक्षसहितको टोली पनि त्यहाँ राहत वितरण गर्न जाँदा दुबै पक्षबीच विवाद भएको हो ।

आफूहरु राहत वितरणका लागि वडा कार्यालयमा सामान मिलाइरहेका बेला अमोद पक्षले अनापसनाप बोल्न थालेपछि झडप भएको घाइते वडाध्यक्ष लक्ष्मेश्वर कापरले प्रतिक्रिया दिए ।

घटना सम्बन्धमा बुझ्दा ईलाका प्रहरी कार्यालय मिर्चैयाका डिएसपी सन्तु जैसवारले सामान्य झडप भएको बताए । यता, घटना सम्बन्धमा मिर्चैया नगरपालिकाका नगरप्रमुख श्रवण कुमार यादवसँग सम्पर्क गर्न खोज्दा सम्पर्क हुन सकेन ।