कोरोना प्रभावितका लागि सरकारद्धारा राहत प्याकेज घोषणा

न्यूज ब्यूरो, काठमाडौं । केन्द्र सरकारले कोरोना भाइरस महामारीले प्रभावितहरुका लागि राहत प्याकेजको घोषणा गरेको छ ।

मन्त्रिपरिषद्को आइतबार बसेको बैठकले राहत प्याकेजको घोषणा गरेको हो । सरकारले स्थानीय तह र प्रदेश सरकारले राहत कोष खडा गरेर अनौपचारिक क्षेत्रका पीडित श्रमिकहरुलाई राहत दिनुपर्ने व्यवस्था गरेको सरकारका प्रवक्ता डा. युवराज खतिवडाले जानकारी दिए ।

त्यसको लागि वडामा गएर आफ्नो परिचय दिएर उनीहरुले राहत लिनुपर्नेछ । यो सुविधा लकडाउन अवधिभरको लागि हुनेछ ।

यस्तै, विद्युत् प्राधिकरणले मासिक १५० युनिट खपतबराबरको प्रयोगकर्तालाई ५० प्रतिशत छुट दिने भएको छ भने खानेपानी र इन्टरनेटमा विलम्बबापतको शुल्क छुट गरिनेछ ।

स्वास्थ्य श्रमिकको लागि असार मसान्तसम्म निःशुल्क २५ लाखसम्मको बीमा र क्षतिपूर्ति दिने पनि निर्णय गरिएको छ । त्यस्तै, सुरक्षाकर्मीको लागि पनि सरकारले निःशुल्क बीमाको व्यवस्था गर्ने भएको छ ।