धनुषाको शहिदनगर र कमला नगरपालिकाले सबै बजार पनि बन्द गर्ने !

न्यूज ब्यूरो, जनकपुरधाम । विश्व महामारीको रुपमा फैलिँदै गएको कोरोना भाइरस रोकथामको लागि सरकारले अनाश्वयक भीड जम्मा नगर्न आग्रह गरे लगत्तै स्थानीय तहहरु समेत हलचलमा आएको छ ।

सोही क्रममा प्रदेश नं. २ को धनुषा जिल्लाको शहिदनगर नगरपालिका र कमला नगरपालिका भित्रको सबै हाट बजार समेत बन्द गर्ने निर्णय गर्न लागिएको जनाइएको छ ।

कमला नगरपालिकाका मेयर राम उदगार गोईतले २५ जना भन्दा बढी कुनै ठाउँमा भीड नगर्न सरकारले जारी गरेको आदेश र आग्रहलाई मध्यनजर गर्दै नगरभरि लाग्दै आएको बजार समेत बन्द गर्ने अवस्था आएको बताउनुभएको छ ।

बजारमा अत्यधिक सर्वसाधारणको भीड भएकोले कोरोना रोकथामको दृष्टिकोणले यस्तो गर्न लागिएको बताउनुभएको छ । उहाँले दैनिक उपभोग्य वस्तु तथा तरकारीको लागि कुनै निश्चित अथवा भीड कम भएको ठाउँमा लिनुपर्ने बताउनुभएको छ ।

शहिदनग नगरपालिकाका मेयर उदय कुमार बरबरिया (यादव) ले कोरोनाको महामारीलाई मध्यनजर गर्दै नगरपालिकाभित्र र बाहिरको सुरक्षा अवस्था कडा पारिएको बताउनुभएको छ ।

उहाँले शहिदनगर भित्रमा लाग्ने सबै तरकारी बजारहरु केही दिनको लागि बन्द गर्ने बताउनुभएको छ । जनचेतना र जानकारीको लािग प्रहरी सहितको टोलीले सबै वडाहरुमा जनचेतनामूलक सूचना लाउडस्पीकरबाट प्रवाह गरिरहेको बताउनुभयो ।

आम नागरिकलाई कोरोनाबाट बच्ने उपायहरु तथा सँक्रमण फैलिन नदिने उपायहरुबारे अडियो बजाएर नगरको सबै वडामा घुमाइदैछ । अनावश्यक भीड नहोस भनेर नगरभित्रको तरकारी बजार सहित अन्य बजार र चोकहरुमा प्रहरी परिचालन गरिएको बताउनुभयो ।

यसबाट आम नागरिक र किसान तथा व्यापारी वर्गमा पर्न जाने असर र त्यसको निराकरणको लागि वैकल्पिक उपायबारे छलफल भईरहेको बताउनुभयो ।

कमला नगरपालिकाको लगमा बजार, मँगराहा बजार, नाथपट्टि बजार लगायतका बजारमा मानिसहरुको भीड हुने गरेको छ । यस्तै शहिदनगर नगरपालिका भित्रको यदुकूहा बजार, कोरारी बजार, डुमरिया बजार लगायतमा अत्यधिक भीड हुने गरेको छ ।

कोरोनाको महामारीबाट बच्नको लागि आम नागरिक, व्यापारी, किसान, युवाहरुलाई समेत आ आफनो तवरबाट सहयोग गर्न आग्रह गरिएको छ । यो केही अवधिको लागि मात्र हुने भएकोले धैर्यता राख्न समेत आग्रह गर्नुभएको छ ।