जनकपुरः अधिक 'दारु' सेवनले एकै टोलका ५ को मृत्यू, सिँगो टोल शोकमा !

न्यूज ब्यूरो, जनकपुरधाम । होली पर्व मनाउँदै गर्दा धनुषामा एकै टोलका ५ जनाको मृत्यू भएपछि सिँगो टोल नै शोकाकुल भएको छ ।

प्रदेश नं. २ को धनुषा जिल्लाको क्षीरेश्वरनाथ नगरपालिका वडा नं. १ र २ को सीमा रहेको रमदैया टोलमा एकै टोलका ५ जनाको मृत्यू भएको ईलाका प्रहरी कार्यालय महेन्द्रनगरले जनाएको छ ।

होलीको दिन अत्यधिक दारु (रक्सी) सेवन गरेपछि विरामी परेका उनीहरुको मृत्यू भएको हो । ईलाका प्रहरी कार्यालय महेन्द्रनगरका प्रहरी ईन्सपेक्टर पप्पु नायकका अनुसार ३ जनाको होलीकै दिन मृत्यू भएको थियो ।

क्षीरेश्वरनाथ नगरपालिका वडा नं. २ का स्थानीय ४८ बर्षिय बिलास मण्डल र ३० बर्षिय ब्रम्हदेव यादवको होलीको दिन नै मृत्यू भईसकेको वडाध्यक्ष श्याम यादवले बताउनुभयो ।

गत २८ गते बुधबार र विहिबारको राती बीचमै उनीहरुको मृत्यू भएको जानकारी उहाँले दिनुभयो । बाँकी ३ जनाको आज विहान ज्यान गएको बताइएको छ । जसमा ६५ बर्षिय गुदरिया महरा, अन्दाजी बर्ष ३० का राम नारायण महरा र अन्य एक गाउँ बाहिरका मान्छेको मृत्यू भएको हो ।

वडाध्यक्ष यादवका अनुसार, बाहिरका भनिएको धनुषाको धनुषाधाम नगरपालिका वडा नं. २ मँगलपुरका थिए । होली पर्वमा ससुरालीमा होली खेल्न आएको बेला अत्यधिक रक्सी सेवनका कारण ज्यान गएको बताउनुभयो ।

मृतक ब्रम्हदेव यादव र रामविलास मण्डललाई हिजो अन्तिम सँस्कार गरिदिएको बताइएको छ । विना पोष्टमार्टमकै उनीहरुलाई जलाएको वडाध्यक्ष यादवले बताएका छन् ।

बाँकी ३ जनाको पोष्टमार्टमको लागि प्रादेशिक अस्पताल जनकपुरमा पठाइएको ईन्स्पेक्टर नायकले बताउनुभयो । उहाँले प्रारम्भिक अनुसन्धान अनुसार अत्यधिक रक्सी सेवनको कारणले मृत्यू भएको हो । थप अनुसन्धान जारी रहेको बताउनुभयो ।