बालुवाटारलाई बेच्नेहरु शिवनगर पनि बेच्ने ? : साँसद कुश्वाहा

न्यूज ब्यूरो, रौतहट । प्रदेश नम्बर २ का प्रदेश सभा सांसद कुन्दन कुशवाहाले बालुवाटार बेच्नेहरुले शिवनगरलाई पनि निजी बनाउन लागेको बताएका छन् ।

शनिवार रौतहटको गरुडा नगरपालिका– ५, शिवनगरमा विकासका लागि अन्तरक्रिया कार्यक्रममा बोल्दै सांसद कुशवाहाले शिवनगरलाई निजीकरण गर्ने खेलमा ठूलो माफियाले चलखेल गरिरहेको आरोप लगाए ।

सांसद कुशवाहाले भने, – “रौतहटको इशनाथ मन्दिरको जग्गा गुठी संस्थानको रेकर्डमा बकाइदा हजात विघाभन्दा बढी रहेको छ तर ती सबै जग्गा अहिले व्यक्तिको नाममा छ । इशनाथ मन्दिर नजिकै रहेको औरैया स्कुलको जग्गा पनि व्यक्तिको नाममा गराइएको छ । तपाइँहरुलाई थाहा छ जानकी मन्दिरको जग्गा समेत व्यक्तिको नाममा गराइएको छ । र यी सबै काममा संलग्नले नै वालुवाटार बेचेको हो।”

ईशनाथ मन्दिर व्यक्तिको नाममा गराउने, जनकपुर मन्दिरको जग्गा व्यक्तिको नाममा गराउने, बालुवाटार व्यक्तिको नाममा गराउनेले अब शिवनगरलाई व्यक्तिको नामको गराउन लागिपरेको आरोप लगाएका छन् ।

शिवनगर मन्दिर शिवनगरवासीको धरोहर रहेको तथा यसलाई बेच्नेविरुद्ध शिवनगरबासी नै उभिनुपर्ने बताउनुभयो ।