मेयर र प्रहरीको प्रयास : शहिदनगरमा डिजे गीत र हर्न प्रतिबन्ध !

न्यूज ब्यूरो, जनकपुरधाम । धनुषाको शहिदनगर नगरपालिकामा अब डिजे बाजा र हर्न (लाउडस्पीकरको होर्न) उपर प्रतिबन्ध लगाइएको छ ।

शहिदनगर नगरपालिकाका मेयर उदय कुमार बरबरियाको विशेष पहल तथा ईलाका प्रहरी कार्यालय यदुकूहाको प्रयासमा डिजे बाजा, गीत तथा हरन निशेष गरिएको हो । वैवाहिक कार्यक्रम, पूजापाठ वा अन्य कार्यको लागि पनि डिजे मिक्स गरिएको गीत, भोजपूरी अश्लिल गीत र रुख वा छतमा झुण्डयाउँदै आएको हरन उपर प्रतिबन्ध लगाएको हो ।

ईलाका प्रहरी कार्यालय यदुकूहाका प्रहरी नीरिक्षक दिपक बाबु केसीका अनुसार, एक साताभित्रै दर्जन बढी जनालाई कारवाही गरिएको छ । पूजाआजा, विवाह, जन्मदिन वा अन्य उत्सवको मौका छोपेर चर्को स्वरमा डिजे मिक्स गरिएको गीत, अश्लिल भोजपुरी किसीमको गीत बजाउन रोक लगाइएको हो ।

यसका साथै, चर्को स्वरको लागि माथि झुण्डयाउँदै आएको हरन (धुधुवा) समेत लगाउन बन्देज गरिएको हो । पूजापाठ, वैवाहिक कार्यक्रम वा अन्य उत्वसमा लाउडस्पीकर उपर कुनै प्रतिबन्ध नलगाइएको बताउँदै प्रहरी नीरिक्षक केसीले आफ्नो उत्सवको नाममा अरुलाई दुःख दिने जस्ता कार्य उपर प्रतिबन्ध लगाइएको बताउनुभयो ।

“हामीले कसैको धार्मिक आस्था, सँस्कृति उपर बन्देज लगाएका होईनौ, तर उत्वसकै नाममा चर्को स्वरमा हरन, डिजे ढम ढम बज्ने गीतले मुटु रोगका विरामी, गर्भवति महिलालाई अत्यधिक असर पार्ने गरेको छ । गर्भवति महिलाले चर्को स्वरकै कारण पनि बच्चा अपाँग जन्माउन सक्छिन् । मुटु रोगीको ज्यान जान सक्छ । यो चिकित्सकले नै भनिसकेको छ । समाजिक सदभाव खलबलाउनु भएन् ।”– उहाँले भन्नुभयो ।

विहेमा जन्ती आउँदा वा जाँदा ट्रयाक्टरमा डिजे बाजा लोड गरी चर्को स्वरमा धन्काउनेलाई मात्र कारवाही गर्ने गरेको बताइएको छ । यसअघि त्यस्ता ७ जनालाई पक्राउ गरी अब देखि चर्को स्वर र अरुलाई दुःख हुने गरी नबजाउने प्रतिबद्धता जाहेरपछि छाडिएको बताउनुभयो । उहाँले भन्नुभयो –“ हामीले बाजा उठाउने होईन, बाजा मास्टर वा सम्बन्धित व्यक्तिलाई नै कारवाही थालेका छौं ।”

शहिदनगर नगरपालिकाका मेयर उदय कुमार बरबरियाले यसअघि नै नगरपालिकामा डिजे र चर्को स्वरको बाजा प्रतिबन्ध गर्ने निर्णय गर्नुभएको थियो । सोही निर्णय कार्यन्व्यन हेतु अब कारवाही प्रक्रिया अगाडी बढाइएको बताइएको छ ।

डिजे बाजाकै कारण गत साता एक जनाको बालाबाखरमा मृत्यू भएको उल्लेख गर्दै प्रहरी नीरिक्षक केसीले अब यस्ता विकृतिलाई न्यूनिकरणको प्रयास थालिएको बताउनुभयो । ठुल ठुला मेला र उत्सवमा मात्र प्रयोग गर्न दिइने जनाउँदै रातैभरि अरुलाई दुःख हुने गरी बजाउन नदिने बताउनुभयो ।

उहाँले शहिदनगर नगरपालिका भित्र कुनै ठाउँमा वा कतै त्यस्तो चर्को स्वरमा हरन झुण्डाएर बजाइरहेको तथा अरुले दुःख पाएमा खवर गर्न आग्रह पनि गर्नुभयो ।

गीतहरुमा वास अर्थात अत्यधिक गुम्की राखेर डिजे मिक्स गरि बजाउने गरेको गीतका कारण मुटुका विरामीहरुलाई प्रत्यक्ष असर पार्ने गरेको छ । डिजेकै कारण कैयौं व्यक्तिको ज्यान गएको उदाहरणहरु प्रष्ट छ । गर्भवति महिलालाई समेत प्रभाव पार्ने भएकोले यसलाई न्युनिकरणको आवश्यकता देखिएको छ ।

रातभरि चर्को साउण्डमा बाजा बजाएको कारण पनि चोरी, डकैतीका घटनाहरु भएपनि समाजमा भईरहेको देखिएको छ ।

महत्वपूर्ण फोन वा कुराहरु चर्को साउण्डका कारण गर्न नसकेर प्रतिकूल असर पर्दै आएको देखिएको छ । यता, डिजेमा प्रतिबन्ध लगाएपछि स्थानीयहरु खुसी भएको ईन्सपेक्टर केसीले बताउनुभयो ।