प्रदेश २ सरकार परिवर्तन हुँदैन : उपेन्द्र यादव

न्यूज ब्यूरो, जनकपुरधाम । समाजवादी पार्टीका अध्यक्ष उपेन्द्र यादवले प्रदेश २ सरकार परिवर्तन नहुने बताएका छन् ।

प्रेस नेपाल सुनसरीद्धारा आयोजित कार्यक्रमलाई सम्बोधन गर्दै उनले प्रदेश २ को सरकारविरुद्ध कुदृष्टि लगाउनेहरु भएपनि राष्ट्रिय जनता पार्टीसँगको सहकार्यमा पूरा अवधि सञ्चालन हुने दावी गरे । पूर्वउपप्रधानमन्त्री यादवले राजपासँग आगामी दिनमा दुई पार्टी एकीकरण हुने बताए ।

उनले सबै नेपालीको चाहनाअनुसार संविधान संशोधन हुनुपर्नेमा जोड दिँदै विश्वमा संविधान संशोधन भएको इतिहास रहेको उल्लेख गरे । अध्यक्ष यादवले सबैको स्वामित्व हुने गरी संविधान संशोधन तथा परिमार्जन नभएमा गणतन्त्र अगाडि बढ्न नसक्ने धारणा व्यक्त गरे ।

एक प्रश्नको जवाफमा उनले संविधान संशोधनको शर्तका आधारमा पार्टी सरकारमा सहभागी भएको जानकारी दिँदै संविधान संशोधन नहुने भएपछि सरकारबाट बाहिरिएको प्रष्ट पारे । अध्यक्ष यादवले संविधान संशोधनका लागि पहिले सदनबाट सङ्घर्ष गर्ने अन्यथा सडकबाट विद्रोह शुरु गर्ने बताए ।