सिरहा जिल्ला कागजमै खुल्ला दिशामुक्त, जथाभावी गन्दा

न्यूज ब्यूरो, सिरहा । सिरहालाई प्रदेश २ कै पहिलो खुल्ला दिशामुक्त जिल्लाको रुपमा घोषणा गरिएपनि कागजमै सिमित भएको देखिएको छ ।

गत २०७४ चैत्र ९ गते सिरहालाई प्रदेश २ कै पहिलो खुला दिशामुक्त क्षेत्र घोषणा गरियो । आज दूई बर्षमा सरसफाईले उल्टो गति लिएको छ । खुला दिशा गर्नेको सँख्या बढेको छ । ६० प्रतिशतले मात्र चर्पीमा दिशा गरिरहेको आज डिवाससीसीको बैठकमा तर्क चलेको छ ।

सरसफाई अभियानपछि स्वच्छता अभियान चलाउँनुपर्ने ठाउँमा एनजिओ आईएनजिओले करोडौ खर्च गरेर विदावारी लिएको छ । अवस्था पूनः पुरानै भएको छ । खुला दिशा व्यापक बढेको छ । सरसफाई अभियान समाप्त भएपछि स्वच्छा अभियान अर्थात पूर्ण खुला दिशामुक्त अभियान स्थानीयतहलाई जिम्मा लगाएर पन्छिएको छ ।

उता, स्थानीयतहका जनप्रतिनिधिहरु डिवाससिसीको बैठकमा समेत उपस्थिति हुँदैन । जिल्ला समन्वय समिति सिरहाका प्रमुख रामचन्द्र ठाकुरका अध्यक्षतामा भएको बैठकमा धनगढीमाई नगरपालिकाका मेयर हरिनारायण चौधरी, सिरहा नगरपालिकाका प्रतिनिधि उपस्थिति भएका थिए ।

जहाँ सिरहाका १७ स्थानीयतहका प्रमुख डिवाससिसीका सदस्य हुन् । स्थानीयतहका प्रमुखहरु नै डिवाससिसीको बैठकमा पुग्दैन । अनि स्वच्छता अभियान उल्टो गति लिनु स्वभाविक नै हो । आईतबारको बैठकमा हात धुने बानीको विकास समेत नभएको चर्चा चलेको छ ।

यसमा सिरहाका ९० प्रतिशत मानिस हात धुन नजाने सार्वजनिक गरेको छ । त्यसमा पनि स्थानीयतहका प्रमुख उपप्रमुख हात धुन नजानेको दावी गरिएको छ ।