मधेशसँग अब ‘ब्रेकअप’ हुँदैन : प्रचण्ड

न्यूज ब्यूरो, सिरहा । नेपाल कम्यूनिष्ट पार्टी (नेकपा) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले अब मधेशसँग आफ्नो ब्रेकअप (सम्बन्ध बिच्छेद) नहुने बताएका छन् ।

सिरहाको सखुवानन्कारकट्टीमा आजबाट सुरु भएको झण्डा महोत्सवको उद्घाटन गर्दै प्रचण्डले यस्तो बताएका हुन् । उनले आफू जहिले पनि मधेशलाई उच्च प्राथमिकता साथ हेरिरहेको तथा मधेशको हित र विकासको लागि आफू गम्भीर रहेको बताएका छन् ।

वर्षौंदेखि लथालिंग परेको हुलाकी सडक निर्माणको काम यो सरकारले तीव्र गतिमा गराइरहेको भन्दै निर्माण सम्पन्न भएपछि यस क्षेत्रमा खुशीयाली आउने बताए । मधेशमा सिंचाईको प्रमुख समस्या रहेको भन्दै कोशी–कमला डाइभर्सन निर्माणको काम चाँडै अगाडी बढ्ने पनि उनले जनाए ।

संविधान संशोधन गर्न पनि आफ्नो पार्टी सकारात्मक रहेको प्रचण्डले बताए । उनले आवश्यकता बमोजिम संविधान परिमार्जन गर्दै लैजाने व्यवस्था संविधानमा नै रहेकाले आवश्यकता बमोजिम परिमार्जन हुने विश्वास दिलाए । प्रचण्डले मधेशसँगको प्रेम टुट्न नदिने बाचा पनि गरे ।

नेपाल भ्रमण वर्षलाई लक्षित गरेर तथा त्यसक्षेत्रको पर्यटकीय विकासको उद्देश्यले आयोजन गरिएको महोत्सव १० दिनसम्म चल्नेछ ।