१० किलो गाँजा र डेढ लाख रुपैयाँ सहित सहनी पक्राउ

न्यूज ब्यूरो, वीरगँज । प्रदेश नं. २ को पर्सा जिल्लाबाट एक जनालाई १० किलो गाँजा सहित प्रहरीले पक्राउ गरेको छ ।

पक्राउ पर्नेमा पर्सा जिल्लाको पटेर्वासुगौली गाँउपालिका वडा नं. १ मलाही टोल बस्ने अन्दाजी बर्ष ४५ को उमेश सहनी रहेको प्रदेश प्रहरी कार्यालय जनकपुरले जनाएको छ । प्रहरीका अनुसार सहनीले आफनो घरमा लागु औषध गाँजा लुकाई छिपाई राखि अवैध कारोवार गरिरहेको सुराकीको आधारमा उनलाई पक्राउ गरिएको हो ।

प्रदेश प्रहरी कार्यालय जनकपुरका अनुसार बिशेष सुचनाको आधारमा जिल्ला प्रहरी कार्यालय पर्साबाट प्रहरी नीरिक्षकको कमाण्डमा खटि गएको प्रहरी टोलीले सहनीको घर खानतलासी गर्दा घर नजिकैको चर्पिको छेउमा लुकाई छिपाई राखेको अवस्थामा लागुऔषध १० किलो गाँजा र नगद पनि बरामद गरिएको हो ।

सहनीकै घरबाट नेपाली १ लाख ४८ हजार रुपैयाँ र भारतीय रुपैयाँ (भारु) २० हजार रुपैयाँ बरामद गरेको हो । सहनीलाई आवश्यक कारवाहीको लागि जिल्ला प्रहरी कार्यालय पर्सामा राखिएको जनाइएको छ ।