उमेश भन्छन्, 'घर आउँदा सपना जस्तै लाग्दैछ'

न्यूज ब्यूरो, जनकपुरधाम । साउदी अरबमा मृत्युदण्डको सजाय पाएका धनुषाका उमेश यादव गाउँ पुग्दा सिंगो गाउँ नै खुशीको आँशु थाम्न सकेनन् ।

झण्डै १४ वर्षपछि आफ्नो पैतृक गाउँ पुगेका उमेशलाई देखेर गाउँलेहरु सपना देखे झैँ देखिए । वैदेशिक रोजगारीको लागि साउदी गएपछि डेढ महिना नबित्दै पाकिस्तानी नागरिकको हत्या अभियोगमा जेल परेका उमेश नेपाल आउने कुरा सबैको लागि सपना जस्तै भइसकेको थियो ।

सपनामै सिमित बनेका उमेश आफ्नो गृहनगर पुग्दाको क्षण हेर्दा जो कोही पनि भावुक देखिए । उनका परिवार र गाउँलेहरु खुशीले अंकमाल गर्दै आँशु रोक्न पाएनन् । साउदी अरबबाट मृत्यु जितेर घर फर्किएका उमेशलाई गाउँमा भव्य स्वागत गरिएको छ ।

गाउँ पुगेपछि उमेशले सपना जस्तै लागिरहेको भन्दै भक्कानिए । 'गाउँ आउँछु भन्ने कुरा सपना जस्तै भइसकेको थियो, आशा मरिसकेको थियो, मलाई पुनर्जीवन दिनुहुने सबैलाई धन्यवाद', उनले भने ।

पाकिस्तानी नागरिकको हत्या गरेको भन्दै उनीविरुद्ध सन् २०१८ मे १५ मा साउदी अदालतले मृत्युदण्ड सुनाएको थियो । त्यसपछि परिवारले समेत उनलाई भेट्ने आशा मारिसकेका थिए । तर, उमेशबारे न्यूज ब्यूरोले प्रथम पटक समाचार प्रकाशित गरेपछि लामो पहल पश्चात् अन्ततः उनी आफ्नो घर फर्केका छन् ।

उमेश नेपाल आउने आशा मारिसकेका उनका परिवारबाट न्यूज ब्यूरोले यसबारे जानकारी पाएपछि सम्प्रेशन गरेको समाचार विस्तारै राष्ट्रिय स्तरमा मात्र नभई देश विदेशमा समेत चर्चाको विषय बन्न पुग्यो । उमेशको मुद्दा चर्चामा आएसँगै समाजिक अभियन्ता सरोज रायले थालेको पहलले अन्ततः रंग ल्याएको छ ।