स्वास्थ्यमा गरिबको पनि सहज पहुँच हुनुपर्छ : डा.घिमिरे

न्यूज ब्यूरो, जनकपुरधाम । युवा अभियनता एवं चिकित्सक डा. देवराज घिमिरेले निःशूल्क स्वास्थ्य शिविर मानव धर्म रहेको बताउनुभएको छ ।

गरिब, निमुखा र विपन्न समुदायको पहुँच स्वास्थ्य क्षेत्रसम्म पनि पूर्ण रुपमा नभएको भन्दै निःशूल्क शिविरको माध्यमबाट सेवा प्रवाह गर्ने अभियानमा लागेको बताउनुभयो । सोही क्रममा शनिबार धनुषाको लालगढमा समेत निःशूल्क स्वास्थ्य शिविर सँचालन गर्नुभएको छ ।

धनुषाको मिथिला नगरपालिका वडा नं. १० प्रगती टोल लालगढमा बृहत निशुल्क स्वास्थ्य शिविर तथा परामर्श सेवा सँचालन गर्दै डा. घिमिरेले ३ सय बढी परिवारलाई सेवा प्रदान गर्नुभएको छ । भरत गिरिको अध्यक्षतामा सँचालन भएको सो शिविरमा नेपालि काङ्ग्रेस केन्द्रिय सद्स्य एवं पूर्व खानेपानी मन्त्री महेन्द्र यादवले डा. घिमिरेलाई सराहना गर्नुभयो ।

सो शिविरको उदघाटन कार्यक्रममा बोल्दै गिरिले घिमिरे जस्ता समाजका असल छोराहरु जन्म लिनु यो समाजको अहोभाग्य भएको बताउनुभयो । “हाम्रो गाउँ घरमा अहिले पनि समयमा उपचार गराउन नसकेकोले गर्दा स्वास्थ्यमा समस्या हुँदै आएको छ सोहीलाई मध्य नजर गर्दै यी बाबुहरु गरेको काम प्रशसनीय छ । ” उहाँले भन्नुभयो । भोलि दिनमा यस्ता काममा निरन्तरता दिन सुझाव समेत दिनुभयो ।

प्रमुख अतिथीको आसनबाट बोल्दै पूर्व मन्त्री यादवले यसै प्रकार हरेक नेपाली आफ्नो आफ्नो ठाउँबाट सहयोग गर्नुपर्ने बताउँदै गरिबको घरलाई पनि स्वास्थ्यको पहुँच हुनुपर्ने बताउनुभयो । सोही कार्यक्रममा नगरपालिकाका नगर प्रमुख हरिनारायण महतोले नगरपालिकामा स्वास्थ्यको विभिन्न शिर्षकमा बजेट विनियोजन गरेको सुनाउँदै स्वास्थयको पहुँच बढाउने बताउनुभयो ।

सो शिविरमा ३ सय ५८ जना विरामीले लाभ लिएका थिए भने निःशूल्क चेकजाँच तथा स्वास्थ्य परामर्श सेवा प्रदान गर्नुका साथै निःशूल्क ‌ओषधी समेत वितरण गरिएको थियो ।

डा. देवराज घिमिरे, चिकित्सक तथा युवा अभियान्ता राजिव घिमिरे, युवा समाजसेवी तथा व्यवसायीले आयोजना गरेको उक्त शिविरलाइ विभिन्न ठाउँ बाट सहयोगि सिटि केयर अस्पताल वर्दिवास, लालगढ अस्पताल, प्रादेशिक चेतना समूह नेपाल लालगढ, श्रीमति जुना केसी एवं सुपुत्र डा. विजय केसी र डा. पुष्कर काफ्लेले सहयोग गरेका थिए ।

शिविरमा रक्त चाप जाच, मधुमेह , प्रेसर, निशुल्क पिसाब जाँच तथा दन्त रोगको समेत जाँच तथा परामर्श सेवा प्रदान गरिएको हो ।

कार्यक्रममा वडा अध्यक्ष उप मेयर तारा देवि लामा ,वडा अध्यक्ष बिक्रम थापा स्थानीय बुद्धिजीवी ,समाजसेवी लगायतको उपस्थित रहेको थियो ।