प्रदेश २ः मतदान अन्तिम चरणमा, १० प्रतिशत मात्र बाँकी

न्यूज ब्यूरो, जनकपुरधाम । आज प्रदेश नं. २ सहित विभिन्न स्थानमा जारी रहेको मतदान प्रक्रिया करिब करिब अन्तिम चरणमा पुगेको छ ।

प्रदेश २ मा राष्ट्रियसभा निर्वाचनको ४सिटका लागि मतदान जारी रहेको छ भने अहिलेसम्म करिब ९० प्रतिशत मत खसेको जनाइएको छ । प्रदेश नं. २ को लागि जनकपुरको महेन्द्रनारायाण निधि सांस्कृतिक केन्द्रमा आज (विहिबार) विहान १० बजेदेखि विधिवत रुपमा सुरु भएको दिउँसो २ः१५ सम्मको अपडेट (अध्यावधिक) अनुसार करिब ९० प्रतिशत मत खसिसकेको हो ।

मतदानको क्रममा सुरुमै सबैभन्दा पहिले प्रदेश २ का मुख्यमन्त्री मो. लालबाबु राउतले मतदान गरी मतदान प्रक्रियाको शुभारम्भ गर्नुभएको थियो । सोही क्रममा प्रदेशका विभिन्न मन्त्री सहित साँसदहरुले भोट गरेका हुन् ।

प्रदेश नं. २ बाट राष्ट्रियसभा निर्वाचनका लागि १ सय ७ जना प्रदेश सांसद र १ सय ३६ जना स्थानीय तहका प्रमुख तथा उपप्रमुख गरी जम्मा ३ सय ७९ मतदाता रहेकोमा लगभग सबै जनप्रतिनीधिहरुको उपस्थिति मतदान स्थल बाहिर देखिएको छ ।

सो क्रममा प्रदेश साँसद तर्फबाट मतदान भईसकेको अवस्थामा रहेको छ भने स्थानीय तहको लागि करिब ६० वटा मत मात्र खस्न बाँकी रहेको निर्वाचन अधिकृत राम कुमार खतिवडाले जानकारी दिनुभयो ।

प्रदेश २ मा राष्ट्रिय सभाको चार सदस्यका लागि हुनगइरहेको निर्वाचनमा ८ जनाले उम्मेदवारी दिएका छन्। निर्वाचनमा नेकपासँग राजपा र कांग्रेससँग समाजवादीले छुट्टाछुट्टै गठबन्धन गरी उम्मेदवारी दिएका छन्।