रौतहट प्रहरीद्धारा तस्करबाट लाखौंको अवैध सामान बरामद

न्यूज ब्यूरो, रौतहट । रौतहटमा प्रहरीले लाखौं मूल्य बराबरका विभिन्न अवैध भारतीय सामान बरामद गरेको छ ।

जिल्ला प्रहरी कार्यालय रौतहटबाट खटिएको प्रहरी टोलीले ती सामान बरामद गरेको हो । प्रहरीले गौर नगरपालिका १ स्थित सिमावर्ती भारतीय बजारबाट तस्करले भन्सार छलेर भित्र्याएका ६ लाख २४ हजार बराबरको अबैध भारतीय सामान बरामद भएको जनाएको छ ।

भन्सार छलेर गौरमा भित्र्याएको रेडिमेड कपडा, साडी, कुर्ता, जिन्स पाईन्ट तथा केही किराना लागयतका अबैध सामान बरामद भएको जिल्ला प्रहरी रौतहटका प्रमुख एसपी रविराज खडकाले जानकारी दिए । बरामद सामान आवश्यक कार्यवाहीको लागी जिल्ला भन्सार कार्यालय गौर पठाइएको जिल्ला प्रहरी कार्यालय रौतहटले जनाएको छ ।

उता, बाराको सिमावर्ती सिम्रौनगढ नगरपालिका–७ खजानीस्थित एकघरमा भण्डारण गरिराखेको १० लाख ३१ हजार मूल्य बराबरको बिभिन्न किराना सामान प्रहरीले बरामद गरेको छ । बरामद सामान आवश्यक कार्वाहीको लागी वीरगञ्ज भन्सार कार्यालय पठाइएको प्रदेश २ का प्रहरी प्रमुख डिआइजी पद्युम्न कार्कीले जानकारी दिए ।