सिरहाबाट सशस्त्रका निलम्बित सहायक हवल्दार ब्राउन सुगरसहित फन्दामा

न्यूज ब्यूरो, सिरहा । सिरहाबाट ब्राउन सुगरसहित सशस्त्र प्रहरीका निलम्बित सहायक हवल्दार पक्राउ परेका छन् ।

ईलाका प्रहरी कार्यालय लहानबाट सादा पोशाकमा खटिएको प्रहरी टोलीले चेकजाँचको क्रममा लहान नगरपालिका १० ग्रामिण चोकबाट सप्तरी सुरुङ्गा नगरपालिका ८ का प्रेम चौधरीलाई ब्राउन सुगरसहित पक्राउ गरिएको हो ।

जिल्ला प्रहरी कार्यालय सिरहाका प्रमुख एसपी उमाप्रसाद चतुर्वेदीका अनुसार चौधरीको साथबाट १५ ग्राम ९२० मिलिग्राम ब्राउन सुगर र २०० मिलिग्राम हवाईट सुगर बरामद भएको छ । स ४ प ४७३ नम्बरको मोटरसाइकलमा चेकजाँचका क्रममा प्रहरीले उनको साथबाट १ लाख ७ हजार ५ सय नेपाली रुपैयाँ, ५ हजार ४ सय ४० भारतीय रुपैयाँ र तीन थान मोबाइल पनि बरामद भएको थियो ।

पक्राउ परेका चौधरी सशस्त्र प्रहरीका निलम्बित सहायक हवल्दार रहेको बुझिएको छ । धनुषामा कार्यरत उनी दुई महिनाअघि निलम्बनमा परेको बताइएको छ ।